Shillong, Ïaïong 26
Ka Shillong Lajong FC ka la ïasam mar shi poiñ ha ka jingïakhun pyrshah ïa ka Dempo SC ha ka jingïakhun kaba nyngkong ka ‘Championship’ jong ka Indian Football League 2025-26, hadien ba kim shym la lah ban thep kol ha ka sngi U Blei ha SSA Stadium, Polo.
Kane ka jingïakhaid ka la pynlong ïa ka Lajong ban jam sha ka kyrdan ba-ar watla ka la ïaryngkat mar 18 poiñ bad ka Sreenidi Deccan hadien ba ka la tam lyngba ka jingïapher ha ka jingthep kol.
Ha ka jingïakhun baroh ar tylli ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba biang eh khamtam ka Lajong, hynrei ki rangïalehkai jong ka lem bad u kapten u Kenstar Kharshong kim shym lah ban pynurlong.
Lyngba kane ka jingïakhaid, ka Lajong ka dangduna haduh 7 poiñ ïa ka Diamond Harbour, kaba danglamkhmat ha kane ka lympung bad kaba la don jingkyrmen ban rah mynta ka aïom.
Te kumta ka Lajong kan pynkhreh biang ïa ka jingïakhun ha la ïing pyrshah ïa ka Chanmari FC ha ka 2 tarik u Jymmang, hashwa ba kan leit sha Hyrderabad na ka bynta ban ïakhun pyrshah ïa ka Sreenidi Deccan ha ka 10 tarik.
