Shillong, Ïaïong 26
Ka dei ka khubor kaba sngewtynnad eh shibun na ka bynta ki riew ieid phutbol ka Jylla hadien ba kawei na ki klob ba paw ka Jylla, ka Mawlai SC ka la poi ha Manipur ban ïa aireng ha ka I-League 3 naduh ka 27 tarik mynta u bnai.
Ka Mawlai kaba dei ruh ka lahduh ha ka Meghalaya State League jong ka aïom ba la lah, bad kaba la rah ar sien ha ka Shillong Premier League hashwa ban rah da ka Langsning ha ka samoi ba dang shu dep. Ka jingdon ka Mawlai SC ha ka SPL ka la pyniap mat shisha ïa ki paidbah bad ka da khring pyndap ïa ki jaka shong haba kane ka kynhun ka mih madan ban ïakhun.
Na ka liang u President ka Shillong Sport Association u Bah Banteidor Lyngdoh (MLA), u pynpaw ka jingsngewkmen kaba khraw halor kane sien jam bad ka long ka jingsarong ïa ka SPL bad ka SSA ba ka la ban pynmih sa kawei ka club ka ban ïa aireng ha katei ka lympung ïalehkai jong ka AIFF. U la ong ruh, ba ka jingleit shim bynta ka Mawlai ha ka I-League 3 kan ai mynsiem ïa kiwei pat kiba don ka sap ha ka phutbol ba kin nangïai tur shakhmat ban ïoh kheit ïa u soh bathiang. U la kitbok kitrwiang ïa baroh kawei ka kynhun naduh ki coach, ki bor pynïaid bad kumjuh ïa ki rangvalehkai jong ka.
Ha kane ka lympung ka Mawlai SC ka hap ka Group-A kaba kynthup ïa ka FC Raengdai, Sikkim Brotherhood Football Club, Sunrise Club Orissa, bad ARA FC bad la ïalam ïa kane ka kynhun da u Coach u Bah Herring Shangpliang.
