Shillong, Ïaïong 26
U Keri G Momin u la long u nongthep kol ba kynsai ha ka lympung ïalehkai 5th Meghalaya State League, ha kaba u la ïoh ban thep haduh hynñiew kol ha ka sngi Saitjaiñ na ka bynta ban pynlong ïa ka A’chik SCO Rongjeng ban pynliem noh ïa ka Balmanduri FC da 9-0 kol ha ka Group-G ha Williamnagar.
Kane ka long ka sien kaba nyngkong eh ïa ka Keri ban thep bun kol ha ka MSL kata ha ka minit kaba 18′, 20′, 24′, 48′, 71′, 81′ & 84. Katba ïa kiwei pat la thep da u Cherryan G Momin (58′) bad u Junjun N Marak (90′).
Katba ka Seng Samla Umdang Pyllun ha ka Group-H bad ka Amlarem SC ha ka Group-C, ki la wanphai da ka jingjop ha baroh ki jingïakhun.
Ha Mawkyrwat, ka Umdang Pyllun ka la ïakhun pyrshah ïa ka Mawten SC ha kaba ka la jop da 4-3 kol. Kane ka la wan urlong lyngba u Bishalboklang Rongrin (29′, 71′) bad u Rangkynsaistar Mawsor (56′, 67′) kiba la thep mar ar kol. Katba ïa ka Mawten la thep da u Wellberjune Lyngdoh (16′), Kynshewbor Pyngrope (54′) bad u Oversharp Ïawphniaw (85′). U Rangkynsaistar u la thep ïa ka kol kaba khatduh na ka bynta ka Umdang Pyllun.
Ha kawei ka liang ka Amlarem SC ka la jop da 4-2 kol ïa ka Lamin XI SCC ha Amlarem. U Sanu Sumer (5′) u la pynkhih jar na ka bynta ka Lamin XI hashwa ba u Wantiwjune Buam (32′) un pynïakhaid. Ïa kawei pat ka kol la thep da u Genial Lamin (46′) ha ka kylla miet, hynrei ka Amlarem ka la lah ban thep biang lyngba u Martial Nongrum (65′), Iaid Da Kyrmen Jungai (65′) bad u Wantiwjune (77′) na ka bynta ban khur syndon ïa ka jingjop.
Ha ka jingïalehkai kaba la long ha madan MFA ha Shillong, ka Mawphu SC ka la jop da 4-0 kol ïa ka Mulang SC Nongbah ha ka Group-B. U Owenderson Nongrud (2′) u la thep ïa ka kol kaba stet tam ha ka MSL 5, katba ki paralok jong u, kata u Steven Kynta (42′), Ferenstar Kharkongor (45′) bad u Archeststar Malngiang (73′) ki la pynbud ïa kiwei pat ki kol.
Ha Wahïajer, ka Lumphyrnai Sohphoh FC ka la pynliem ïa ka Ïatyllilang Lumsehkot CSC da 4-0 kol ha ka Group-E. U Rio Marboh (9′, 70′, 90’+5) u la khur ïa ka hat-trick lem bad iwei pat la thep da u Deibanskhem Kharsati (32′).
Kiwei pat ki jingïalehkai kiba la jop da ka said ki long ha Khliehriat bad ha Mairang.
Ha ka jingïalehkai jong ka Group-D, ka Thangskai Tiger SC ka la pynliem noh ïa ka Jalaphet Moochut Pyrdung da 1-0 kol bad ïa kane la thep da u Michael Siangshai (26′). Katba ha Mairang, ka Mishon SSCC ka la jop da 2-0 kol ïa ka Lawbah SC lyngba u Pyndapbok-lang L Lyngkhoi (74′) bad u Rikyr-shan Warjri (86′).
Ïa kane lympung la lah ban pyndep ïa ka wat kaba nyngkong, katba ka wat kaba ar kan sdang naduh ka lah sngi U Blei lait noh ha ka Wahïajer bad ha Williamnagar, kiba danghap ban pyndep ïa ki jingïaleh-kai ba dangsah.
