Shillong, Ïaïong 26
Ka lympung ïakop jong ka 2nd Senior East Zone National Roll Ball Championship 2026 ka la poi sha kaba kut noh ha ka sngi Saitjaiñ ha kane ka nongbah ha kaba ka Jharkhand bad ka Assam ki la khur ïa ka nam lahduh, katba ka Meghalaya ka la wan ha ka kyrdan balai.
Ïa kane ka lympung ïalehkai kaba ar sngi la sdang naduh 24 tarik mynta u bnai ha Basketball Court kaba ha Jawaharlal Nehru Sports Complex, Polo ha kaba la wan shim bynta da ki nongïalehkai na ki jylla bapher bapher jong ka ri kiba kynthup ïa ka Assam, Manipur, Arunachal Pradesh, Jharkhand, Chhattisgarh, West Bengal, Odisha, Meghalaya bad na Nagaland na ka bynta ban pyni ïa ki sap ïalehkai jong ki.
Ka Jharkhand ka la khur ïa katei ka nam ha ka liang ki shynrang ha kaba ïa ki kyrdan ba-ar la ïoh da ka Meghalaya bad ka Odisha. Ha ka liang ki kynthei la rah da ka Assam ha kaba ïa ka kyrdan ba-ar la ïoh da ka Jharkhand, katba ka Meghalaya ka la wan balai.
Ha katei ka sngi pynhap pyrda la ïadon lang u Sanjib Kakaty, uba long u nonghikai ka IIM Shillong kum u kongsan ha ryngkat ka jingïadon lang ki dkhot nongïalam ka Meghalaya Roll Ball Association bad kiwei kiwei. Ïa kane ka lympung la kyrsan lang da ka tnat ïalehkai jong ka Sorkar Jylla.
Na ka liang ka synjuk ïalehkai jong ka Meghalaya Roll Ball ka la ai khublei ïa baroh ki kynhun kiba la wan ïashim bynta, ki nongkitkam, ki nongïarap lem bad ki nongkyrshan n aka bynta ban pynlong ïa kane ka lympung kaba jop.
