Shillong, Ïaïong 27
Ka shnong Mawlai Maw-roh ka la long kaba shongshit lyngba ka jingpynlong ïa ka State Junior (15-16 years) Boys & Girls and Youth (17-18years) Men & Women Boxing Cham-pionship 2025-2026, ha kaba la wan shim bynta da ki nongïakura kynthei bad shynrang na kylleng ki district jong ka Jylla.
Ïa kane ka rynsan ïakura kaba saw sngi lynter la pynlong da ka Meghalaya Boxing Association (MBA) ha ryngkat ka jingkyrshan da ka tnat ïalehkai ka Sorkar Jylla
Ïa kane ka lympung la phiah ha la ki jong ki kyrdan na ka bynta ki kynthei bad shynrang kata ka junior (15-16 snem) bad ka youth (17-18 snem) kiba long ha la ki jong ki jingkhia, kiba long kat kum ka rukom pynïaid ha kylleng jong ka ri bad wat shabar ri, la pynpaw u Technical Director ka MBA u Bah Larry Kharpran ha ka jingïalang sdang ïa kane ka lympung.
Haba kheiñ kyllum ki la don haduh 105 ngut ki nongïakura kiba la wan shim bynta na kylleng ki phra tylli ki district jong ka Jylla bad ki klob na ka bynta ban pyni ïa ki sap ïalehkai jong ki.
Ïa kane ka lympung ïakura la plie da u Assistant Director ka tnat ïaleh-kai ka Sorkar Jylla u Bah Païa B War Nongbri kum u kongsan ha ryngkat ka jingïadon lang ruh u General Secretary ka Meghalaya State Olym-pic Association (MSOA) Bah Finely Lad Pariat, u Rang-bah Shnong ka Mawlai Mawroh lem bad ki dkhot ka MBA.
“Ka jingïakura ka long kawei na ki jingïalehkai kaba paw ha ka Jylla ha kaba ka dangdon ha ka jingpynkhreh na ka bynta ka National Games ka ban long ha u snem ban wan,” la ong u Bah War Nongbri haba ai jingkren ha ka jingïalang plie ïa kane ka lympung.
“Lyngba ka jingbtin lynti ka MBA, nga thikna ba ki nongïalehkai kin lah ban ïakhun ha ki lympung ïakura kiba kham heh.”
U Bah War u la ong ba ka jingdon ïa ki nongïakura ka long kaba biang eh na ka bynta ka MBA ha ka lawei ka ban wan. Lyngba kane ka rynsan ïakura phin sa kiew sha ka kyrdan senior bad kham shajrong shuh shuh.”
Te kumta u la kyntu ïa ki khynnah ba kim dei ban klet pat ïa ki jingpule watla ki hap ban pynlut por ha kane ka jingïalehkai.
