Shillong, Ïaïong 27
Ka Shillong Lajong FC, Nangkiew Irat SC bad ka Khimusniang SC ki la bteng ban thep kol bun ha ka lympung ïalehkai 5th Meghalaya State League ha ka lah sngi U Blei wat hapdeng u slap uba jur ha kylleng ki district jong ka Jylla.
Ka jingïalehkai jong ka Group-F hapdeng ka Lawbah SC bad ka Mishon SSCC ha Mairang ym shym la lah ban pynlong na ka daw ka jinglong jong ka madan bad yn hap ban pynlong pat hadien.
Ha Mawkyrwat, ka jingïalehkai jong ka Group-H hapdeng ka Mawlarshong SC bad ka Rangdajied United FC ki la kut noh ha ka jingïakhaid khlem da lah ban thep kol. Ha ka wat kaba nyngkong ki la ïakhaid mar 1-1 kol bad ka Mawlarshong ka la long ka kynhun kaba khlem shah rem ha ki ar tylli ki jingïalehkai pyrshah ïa katei ka lahduh ha ka MSL 2023.
Kumjuh ka jingïalehkai kaba la long ha Williamnagar ka la long kumjuh hapdeng ka Janepih YSCA bad ka Balmanduri FC ha kaba kim shym la lah ban thep kol haduh kaba kut ki 90 minit. Kham hashwa ka Janepih ka la lah ban khur jingjop baroh lai sien ki jingïakhun ba la lah ha ka Group-H, hynrei mynta ka kynti kam shym la lah ban pynurlong.
Ha ka jingïalehkai jong ka Group-D ha Khliehriat, ka Thang-skai Tiger SC ka la jop da 2-1 kol ïa ka Jalaphet Moochut Pyrdung SC. Watla kine ki kynhun kim shym la lah ban thep kol ha ka kylla step, hynrei ha ka kylla miet, ka Jalaphet Pyrdung ka la ïoh ban pynkhih jar lyngba u Thomas Dkhar (53′). Pynban ki rangïalehkai ka Thang-skai Tiger ki la ïeng skhem ban ïakhun tyngeh na ka bynta ban pynphai kylla ar kol lyngba u Wendi Markson Nongtdu (72′) bad u Solmon Sympli (87′) na ka bynta ban khur ïa ka jingjop.
Ha ka jingïakhun jong ka Group-C, ka Amlarem SC ka la pynliem noh ïa ka Lamin XI CC da 3-1 kol, katba ka lahduh ka samoi ïalehkai u snem 2019, ka Shillong Lajong FC ka la lah ban pynliem noh ïa ka Ïatyllilang Lumsehkot CSC da 5-0 kol ha ka Group-E kaba la long ha Wahïajer.
Kumjuh ka Nangkiew Irat FC ka la jop da 5-0 kol ïa ka Mawlum Tyrsad SCC ha ka jingïakhun ka Group-B. U Wallamsuk Nongkhlaw (75′, 85′, 90′) u la khur ïa ka hat-trick.
Ha ka jingïakhun jong ka Group-A ha SSA Stadium Polo, ka Khimu-sniang ka la pynliem ïa ka Umkaber SCC da 9-0 kol. U Primrose Lamat (3′, 45’+2) u la thep ar kol na ka bynta ban kynjoh sha ki 9 kol ha ka jinglah jong u ban thep kol ha kane ka lympung. Ïa kiwei pat la thep da u Meroily Lytan (12′, 89′), Dashngaiñ Sukhlaiñ (30′), Dawanbiangmi Passah (36′) bad u Civility Khongmalai (69′).
