Nongstoiñ, Ïaïong 27
Ka lympung ïalehkai 3rd Invitation Cricket Tournament 2026 ba la pynlong da ka UDP Youth Wing Nonghyllam Unit ka la poi sha kaba kut, ha kaba ka Rainbow Warrior Nonghyllam ka la long ka lahduh, hadien ba ka la pynliem noh ïa ka Rajapara Cricket Team da 5 run.
Ha ka jingïalehkai phainal kaba la long ha madan ïalehkai Nonghyllam kaba ha South West Khasi Hills District, ka la long kaba itynnad bha ha ryngkat ka jingsakhi lang ki spah ngut ki paidbah.
Haba kut jong ka jingïalehkai la sam ïa ki khusnam sha baroh ar tylli ki kynhun ha kaba ka Rainbow Warrior Nonghyllam ka la ïohpdiang ïa ka khusnam pisa kaba T. 1,50,000/- bad kaba wan ba-ar ka la ïoh T. 75,000/-.
La sam ruh ïa ki khusnam shimet kata u Rongan Marak ula ïohpdiang ïa ka nam kum u ‘rangïalehkai ba tbit namar ka jingnoh synñiang ba radbah jong u ha ka phainal. Katba ïa ka khusnam ‘rangïalehkai ba tbit ha kane ka lympung la ïoh ïa u Devetion Lyngdoh namar ka jingïalehkai kaba ïaineh bad kaba kyrpang jong u ha baroh kawei ka lympung .
