Guwahati, ïaïong:
Ka District and Sessions Court, Nagaon ha Assam, ha ka sngi Thohdieng, ka la rai pynrem ïa ki 20 ngut ki briew, kiba la shah rai pynrem halor ka jingshah pynïap beiñ jong ki arngut ki samla na Guwahati ha Karbi Anglong distrik, ha ka 8 tarik, Jylliew, 2018.
Ka ïingbishar kaba la pynngat ruh ïa ka kuna kaba T.20 hajar ïa uwei pa uwei na ki, ka la pynrem ïa ki ha ka lah sngi U Blei ba la dep hynrei ka la ai ïa ka rai jingpynshitom ha ka sngi Thohdieng.
La pyllait noh ïa 25 ngut kiwei pat kiba shah kynnoh namar ba ym don ki sakhi kiba biang pyrshah ïa ki.
Ka jingshah pynïap jong ki arngut shi paralok, u Nilotpal Das, uba dei u Sound Engineer bad u Abhijeet Nath, uba la iehnoh ïa ka kam Engineer, ka la pynmih ïa ka jingbitar ha ka ri baroh kawei. Ki longïing jong ki kiba la ap haduh 8 snem ïa ka hok, kim shym la sngewhun pura ïa ka jingai jingpynshitom.
“Ngi kwah ïa ka rai ban pynïap na ka bynta ar ngut napdeng ki san ngut kiba shah rai pynrem, hynrei baroh 20 ngut ki la shah set phatok shi jingim. Hynrei, hapdeng ka jingsngewsih, ka don ka kjat sngi jong ka jingkmen,” ong u kpa jong u Abhijeet, u Ajit Kumar Nath, ha ki lad pathai khubor shabar jong ka ïingbishar.
“Ka kashari ka la ong ba kane kam dei ka mukotduma kaba kham duna bha. Lada kane kam dei, te kaei kaba jia,” u la lyngngoh.U kpa jong u Nilotpal, u Gopal Chandra Das ruh u don ka jingsngew ba ïapher. U la ong ba u la khmih lynti ba ka ïingbishar kan pynshitom da kaba pynïap ha ki kti ka aiñ ïa ki nongthombor ba hakhmat eh.
“Nga sngewkmen bad sngewsih ruh. Ka jingjia ka dei kaba donkti bad ka jingpynïap beiñ. Lada kane kam wan hapoh ka jingpynïap beiñ, kaei kaba wan”, la ong u Das ha ki lad pathai khubor. Baroh ar tylli ki longïing ki la pynpaw ba kin ïasyllok bad ki nongïasaid aiñ jong ki bad kin rai la ki dei ne em ban ujor sha ka Gauhati High Court.
Ha kata ka sngi ba sngewsih, u Nilotpal bad u Abhijeet ki la leit sha ki wahduid Kangthilangshu ha Karbi Anglong ban ring dur ïa ki sur jong ka mariang. Haba ki dang wan phai, ka kynhun ki runar ka la thombor ïa ki haduh ba kin da ïap namar ka jingsuba ba ki dei ki nongrahbor ïa ki khynnah. Katei ka jingjia, ka la jia ha Panjuri Kacharigaon, kaba dei ka shnong jong ki riewlum, kaba don kumba 200 km shaphang Mihngi na Guwahati.
Ha ka rai jong ka, ka ïingbishar ka la ong, “Kane ka jingshisha kaba pynsngewsih ka la paw ha ka jingim jong arngut ki khynnah shynrang, kiba la mih ban leit jngoh ïa ka jingitynnad jong ki wahduid Kangthilangshu, kum shi bynta jong ka jingpule jong ki ïa ka mariang.”Ki pulit ki la kem ïa 48 ngut bad hadien la lap ba lai ngut ki dei kiba dang poh rta.
