Gangtok, ïaïong:
U Myntri Rangbahduh ka ri, u Narendra Modi, hadien ba u la dep ïalap elekshon na ka bynta ka elekshon sha ka Ïingdorbar Thawaiñ jong ka West Bengal 2026, u la sdang ïa ka jingleit jngoh kaba ar sngi sha Sikkim kaba sdang naduh hynnin ka sngi, ka 27 tarik, Ïaïong. Ha kane ka jingleit jong u sha kane ka jylla ka thaiñ Shatei-lam-Mihngi, la buh por ba un ïashim bynta ha ka jingïalang pynkut ban rakhe ïa ka jingdap 50 snem jong ka jingseng ïa ka jylla.
Katkum ka khubor ba la ïohlum, la ong ba u Modi un sa pynpaw ruh ïa ki jingïaid lynti jong ki kam pynroi kiba kot palat ïa ka 4,000 klur tyngka.
Hadien kane, ha ka 28 tarik, Ïaïong, kata mynta ka sngi u Myntri Rangbahduh un leit jngoh ïa ka Orchidarium ha Gangtok, kaba la pynwandur kum ka jaka ïoh jingtip ïa ki syntiew Orchid kaba pawnam ha ka pyrthei ban pyni ïa ka jinglong tynrai ba riewspah jong ka jylla halor ka mariang bad ki syntiew.
Ha ka lah sngi U Blei u Modi u la don bynta ha ka jingïalang pynkut ïa ka jingrakhe ïa ka Golden Jubilee ha Paljor Stadium. Katkum ka jingïathuh ka tyllong khubor, la ong ba u Modi ha ka sngi ba nyngkong u la buh ïa u maw nongrim jong ki projek kiba ïadei bad ki bynta kum ki jingtei, ka jingpynïasoh, ka koit ka khiah, ka pule puthi, ka bor ding, ka jingpynroi sor, ka mariang, ka kam jngohkai pyrthei, bad ka rep ka riang.
Ha ka liang ka koit ka khiah, u Myntri Rangbah u la plie ïa u mawnongrim na ka bynta ka jaka sumar Ayurveda kaba 100 jingthiah ha Yangang ha Namchi districk bad ïa ka Integrated Sowa Rigpa Hospital kaba 30 jingthiah ha NIT Deorali.
U Modi u la plie ruh ïa ka jaka pule ba neh jong ka Sikkim University ha Yangang, ïa ka Administrative Block jong ka Netaji Subhash Chandra Bose University of Excellence ha Chakung, ïa ka Helen Lepcha Medical College ha Socheygang, bad ïa ka Dentam Professional College ha Gyalshing distrik.
Nalor kine, kumba la pynbeit yn plie paidbah ruh ïa ki skul ba la shna da ki Model Residential ha Hee Gyathang, ka Model Degree College ba thymmai ha Mangshila, bad ka Monastic Hostel-cum-Classroom ha Boomtar Gumpa.
Yn sa sdang ruh ïa ki projek pynroi ba pyndonkam da ka IT ha kylleng ki 160 tylli ki skul, katkum ka jingong jong ka IANS.
Ban kyntiew ïa ka jingpynïasoh, u Modi un buh ruh ïa u maw nongrim na ka bynta ar tylli ki jingkieng nar ba don ar lynti halor ka wah Teesta ha Sirwani bad Lower Samdong bad plie ïa ka surok ba la pynbha na Birdhang sha Namchi lyngba ka Kitchudumra.
Ha ka liang ka bording, yn plie ïa ka jingpynthymmai ïa ka rukom pynpoi bad sam bording ha Gangtok.
Hapoh ka jingpynroi sor, ki projek ban plie paidbah ki kynthup ïa ka Jan Seva Sachivalaya ha Lumsey, ka Civil Service Officers Institute ha Gangtok, ki jingthmu shna iing hapoh ka Sikkim Urban Garib Awas Yojana, bad ki jaka sah jong ki pulit.
Katkum ka por ba la buh, u Myntri Rangbahduh un plie ruh ïa u maw nongrim na ka bynta kawei ka Sadhbhav Mandap ha MG Marg.
