Shillong, Ïaïong 27
U Sabastian Sawe u la thaw ïa ka khana ha ka London Marathon da kaba long u nongmareh ba nyngkong eh ban pyndep tang hapoh ar kynta ha ka jingjngai kaba 42.195 kilometer ha ka sngi U Blei.
Une u rangïalehkai ba 30 snem ka rta na Kenya, u la lah ban pyndep ha ka shi kynta 59 minit 30 sekhon, kaba tam da shi minit kham stet ïa ka rekod kaba mynshwa ba la bat da u (L) Kelvin Kiptum, kaba long 2:00:35 ha u snem 2023.
U Eliud Kipchoge u la long uba nyngkong eh ha ka jingïakop mareh marathon ban pyndep hapoh ar kynta ha u snem 2019, hynrei kata kam shym la long kaba lah ban buh rekod namar ba la pynlong hapoh ki kyndon ba la tehlakam.
Naduh ba u la lah ban pyndep ïa ka half marathon ha ka 1:00:29 sekhon, u Sawe u la lah ban kham pynsted ïalade ha ka rukom ïalehkai ban ïa kaba long ha ka por jong u Kipchoge.
U Sawe u la leh ïa ka sienjam kaba kongsan bha shwa ka 10km kaba khatduh, ha kaba tang u Yomif Kejelcha uba la lah ban don ha ka thong ka jingïaknieh na ka bynta ban beh ïa u. Te kumta u Kejelcha u la long u nongmareh uba ar ban pyndep ha ki 1:59:41. Katba ïa ka kyrdan balai la ïoh da u Jacob Kiplimo hadien ba u la lah ban pyndep ha ki 2:00:28.
Halor kane ka jingjop, u Sawe u la ong: “Nga sngewkmen halor kane ka jingjop bad ka dei ka sngi ban pynsah kynmaw na ka bynta jong nga.”
“Ngi la sdang ban ïalehkai bha ha kane ka jingïakop ha kaba nga la nangïoh bor ban pyndep ïa ka thong bad nga da sngewkmen eh ba nga la lah ban pyndep hapoh ka por kaba biang.”
Ha ka jingïakop mareh jong ki kynthei, ka Tigst Assefa na Ethiopia ka la lah ban bat ïa la ka jong ka rekod ha ka pyrthei hadien ba ka la lah ban tam ïa ki para nongmareh na Kenya ka Hellen Obiri bad ka Joyciline Jepkosgei da kaba ka la lah ban pyndep ha ki 2:15:41.
