Yn mihkhmat ka Alisha bad Bonifilia ïa ka India ha ka AFC U-17 Women’s Asian Cup

Shillong, Ïaïong 27

Ka Alisha Lyngdoh bad ka Bonifilia Shullai ki la long ki ar ngut ki ‘thei ïalehkai ka Jylla kiba la shah jied biang ban don ha ka thup jong ka kynhun ïalehkai ka ri India na ka bynta ka AFC U-17 Women’s Asian Cup China 2026.

Kine ki ar ngut ki la don lang bad ka kynhun hapoh ka jingïalam ka Pamela Conti (coach) kiba la poi sha Suzhou ha ka lah sngi U Blei, hadien ba ki la kilanmet katto katne por ha Gurugram, India.

Ka India, kaba la ïoh rung sha katei ka lympung hadien 21 snem, kan sdang ïa ka jingïalehkai kaba nyngkong ha ka Group-A pyrshah ïa ka Australia ha ka 2 tarik u Jymmang, hadien kan ïakynduh sa ïa ka Japan ha ka 5 tarik bad ïa ka Lebanon ha ka 8 tarik. Baroh kine ki jingïalehkai kin long ha madan ïalehukai jong ka Suzhou Taihu Football Sports Centre.

Ki ar tylli ki kynhun ki ban wan ha ki kyrdan ba hakhlieh na kawei pa kawei ka group lem bad kiwei pat ki ar tylli kiba kynsai ki ban wan ha ka kyrdan balai, kin ïoh rung sha ka quarter final. Katba ki saw tylli ki kynhun ki ban khur jingjop ha ka quarter final kin ïoh rung sha ka FIFA U17 Women’s World Cup Morocco 2026.

Ka India hapoh ka jingïalam ka coach kaba na Italy (Pamela Conti) kaba la shah thung naduh u Kyllalyngkot mynta u snem, ka la long ba la pynkhreh la kumba lai bnai ha Bengaluru na ka bynta katei ka lympung bad ka la ïoh ban shim bynta ha ki ar tylli ki jingïalehkai paralok pyrshah ïa ka Myanmar ha Yangon.

Dangshen mynta u bnai, kane ka kynhun ka la ïashim bynta ha ki jingïalehkai paralok pyrshah ïa ka Russia ha Sochi, ha kaba ka la shah rem baroh lai tylli ki jingïakhun.

Hadien ka jingwanphai na Russia, kane ka kynhun ka la bteng ïa ka jingkilanmet ha Gurugram naduh 20 haduh 26 tarik mynta u bnai hashwa ba kan leit sha China.

Ki kyrteng ki 23 ngut ki ‘thei ïalehkai ka India 

Goalkeeper: Munni, Surajmuni Kumari & Tamphasana Devi Konjengbam.

Defender: Abhista Basnett, Alena Devi Sarangthem, Alisha Lyngdoh, Divyani Linda, Elizabed Lakra, Joyshini Chanu Huidrom, Ritu Badaik & Taniya Devi Tonambam.

Midfielder: Alva Devi Senjam, Bonifilia Shullai, Julan Nongmai-them, Olivia Chanu Ningthoujam, Pritika Barman, Redima Devi Chingkhamayum & Thandamoni Baskey.

Forward: Anushka Kumari, Anwita Raghuraman, Joya, Pearl Fernandes & Valaina Fernandes.