Agartala, ïaïong:
U Myntri Rangbah ka Tripura, u Manik Saha, u la leit jngoh ïa ki katto katne ki jaka ba la shah ktah hadien ba u la wan phai na ka jingïalap elekshon ha West Bengal, ha kaba u la bishar bniah ïa ki jingjulor bad bthah ban leh mardor hadien ka jingïakynad hadien ka jingthep vote ha kylleng ka Jylla.
Haba la synran lang da u Chief Secretary u JK Sinha, ki heh ophisar pulit, ba kynthup ïa u DGP Anurag, bad ki bor pynïaid distrik, u Saha u la bishar bniah ïa ka jinglong jingman ha madan bad ki jingïarap kiba dang ïaid shakhmat. La bthah ïa ki heh sorkar ban pynphai biang ïa ka jinglong jingman, ban pynlong ïa ki jingpeit bniah ïa ki jingjulor, bad ban sdang ban siew bai lutksan ïa ki longïing kiba shah ktah khlem da pynslem.
La pynmih ruh ïa ki jingbthah kiba tyngeh sha ki bor pynjari aiñ ban leh da kaba tyngeh pyrshah ïa kiba donkti.
Naduh kata ka por la pynkynriah ïa ki heh ophisar ha ki jaka kiba sngewkhia bad kiba lah ban shah ktah, da kaba peitngor bha bad pyntreikam ïa ki lad jingïada ban pynbeit ïa ka jinglong jingman.
Ka jingïakynad ka la ïai bteng naduh ba la pynbna ïa ka jingmih jong ka elekshon ADC ha ka 17 tarik, Ïaïong, ha kaba la ïoh jingtip ïa ki jingjia jong ki jingïakynad kiba bun ha kylleng ka jylla.
U Magistrate jong ka West Tripura District u Vishal Kumar u la kyntu ïa ki paidbah nongshong shnong ba kin long kiba husiar bad ban pyntip ïa kino kino ki kam kiba suba ne kiba pynkhihwin. U la pynthikna ba ki lad jingïarap ki dang ïaid shakhmat bad ong ba ki bor synshar ki la trei hapoh ki jingbthah kiba shai.
“Naduh kaba sdang, ka la don ka jingbthah kaba pyrkhing, la ka long ki pulit ne ki bor synshar… baroh ki kam sniew la bishar bniah, la pynshisha & ha kajuh ka por, la ai jingpyllait ruh,” ong u Kumar.
U la bynrap ruh ba ki ophisar kynthup ïa ki ophisar pynroi jong ki Block bad ki Sub-Divisional Magistrate ki dang ïai buddien bha ïa ki jaka ba sngewkhia. “Baroh ki heh jong ngi… ki don ha ka jaka ym tang ban peit bniah ïa ki jinglong jingman hynrei ban long ruh kiba don & ban buddien ha kito ki jaka kiba khia ha kaba ki jinglong jingman jong ka aiñ bad ka shongsuk shongsaiñ ki lah ban nang sniew,” u la ong.
U Kumar u la pynpaw ba ka jinglong jingman mynta ka long kaba suk bad ba ka bor synshar ka dang ïatreilang bad ki nongïashim bynta. “Kumba ka long mynta… ka jinglong jingman ka long kaba suk, bad ngi dang ïakynduh bad baroh ki nongshim bynta bad ngi khmih lynti ba kane ka jingsuk kan dang ïai bteng,” u la ong, da kaba kyrpad ïa ki nongshong shnong ba kim dei ban “sngewtynnad ïa kano kano ka jingleh bym shisha ne kaba pynkhihwin” bad ban pyntip ïa ki jingeh sha ki bor synshar shnong.
Ha kajuh ka por, la ïathuh ba katto katne ki ïing jong ki nongtrei BJP ki la shah pynpra, kaba la pynlong ïa ki longïing ban wad jaka rieh ha ki jaka sorkar bad ki jaka kiba kham shngaiñ.
Ki khubor ki pyni ba kito kiba shah ktah ki la phet krad na la ki jong ki ïing ki sem namar ka jingtieng ïa ki jingshah thombor shuh shuh kiba la kynnoh ba ki nongkyrshan jong ka Seng Tipra Motha hadien ka jingjop elekshon jong ki.
