Shillong, Ïaïong 28
Ka Mawlai SC ka la shah pynïa-khaid mar 2-2 kol ha ka Laskein SCSC ha ka 5th Meghalaya State League, ha ka sngi Ba-ar ha Amlarem.
Ha kane ka jingïalehkai jong ka Group-E, Mawlai ka la sei da kiba kham khynnah namar kiba bun ki la leit sha Manipur ban shim bynta ha ka I-League 3 na ka bynta ban mihkhmat ïa ka Jylla ha ka sien kaba nyngkong eh. Te kumta tang mar ïasdang ka jingïalehkai ka Mawlai ka la shah thep kol nyngkong ha ka Laskein lyngba u Bundaki Lamare (9′).
Hadien shiteng kynta u Jesti-bor Mawlong (32′) u la lah ban pynïakhaid kylla na ka bynta ka Mawlai na ka bynta ban ïakhaid mar shi kol ha ka kylla step. Hadien katto katne por ka Mawlai ka la thep biang ïa ka kol kaba ar lyngba u Syndongmiki Lyngdoh (55′) hashwa ba ka Laskein kan pynïakhaid kylla ha ka minit kaba 60 lyngba u Rithrangmiki Biam.
Ha kane ka lympung, ka Langsning FC bad ka Nongkseh SSCC ki la thep mar 8-0 kol pyrshah ïa ka Umlakro SC bad ka Mawshun SC ha la ki jong ki jingïalehkai.
U rangïalehkai ka Langsning u Nelson Rymbai (32′, 62′, 88′, 90’+1) u la bteng ban ïalehkai bha ha Mairang da kaba u la lah ban thep marwei haduh saw kol na ka bynta ban bat ïa ka kyrdan ba hakhlieh jong u nongthep kol ba kynsai ha kaba mynta u la kynjoh sha ki 11 kol. Ïa kiwei pat la thep da u Mebanlamlynti Masharing (29′), Samuel Phawa (56′) Morning -star Khongkiang (79′) bad ïa kawei pat la ïarap pynthep da ka liang pyrshah ha ka minit kaba 73 na ka bynta ban pynlong ïa ka Langsning ban khur ïa ka jingjop ha ka Group-F.
Ha ka jingïalehkai kaba la long ha SSA Stadium kaba ha Shillong, u rangïalehkai ba kynsai ka Nongkseh u Chesterpaul Lyngdoh (16′, 35′, 88’P) u la khur ïa ka hat-trick ha ka Group-A. Kane ka long kaba sien kaba ar ïa u ban khur ïa katei ka hat-trick. U Hardy Cliff Nongbri (11′, 90’+2), Shano Tariang (52′, 90′) ki la thep mar ar kol lem bad kawei da u Fullmoon Mukhim (90’+4) na ka bynta ban pynlong ïa ka Nongkseh ban khur ïa ka jingjop.
Ha ka Group-E kaba la long ha Wahïajer, ka Lumphyrnai Soh-phoh FC ka la pynliem ïa ka Lamyrsiang SCC da 6-1 kol. U Rio Marboh (9′, 45’+3, 72′, 79′) uba la lah ban pynurlong ïa ka jingjop ha ka jingïalehkai ba la lah, u la thep saw kol. Ïa kiwei pat ki kol la thep da u Phrangsngi Law (81′) bad u Chandame Suna (90’+3) na ka bynta ka Lumphyr-nai, katba u Seiborki Kharlukhi (34′) u la pynphai kylla shi kol na ka bynta ka Lamyrsiang.
Ha ka jingïalehkai jong ka Group-B kaba la long ha madan MFA, ka Mawphu SC ka la pynliem ïa ka Mulang SC Nongbah da 3-2 kol. U Woldrik Susngi (10′) u la pynkhih jar nyngkong na ka bynta ka Mulang, hynrei ka Mawphu ka la wanphai da ka jingkhlaiñ bor na ka bynta ban thep kylla haduh lai kol lyngba u Arkidon L War (28′), Larikupar Nongkynrih (64’P) bad u Banman Roy Nongsiej (83′). Hashwa ban wai u Dashwakini Susngi (90′) u la lah ban pynphai na ka bynta ka Mulang hashwa ba kan mad ïa ka jingshah rem kaba saw.
Ha ka Khliehriat (Group-D), ka Rymbai Shkenshynriah SC ka la jop da 2-1 kol ïa ka Ladthadla-boh SC. U Pynïaidskhem Sylliang (31′) u la thep kol nyngkong na ka bynta ka Ladthadlaboh, hynrei u Hesmiki Rymbai (67’P, 90’+2) u la lah ban pynphai kylla ar kol na ka bynta ban pynlong ïa ka Shkenshynriah ban khur ïa ka jingjop.
Ha Williamnagar, ka Maram FC ka la pynkut noh ïa ka jingïaid lynti ka A’chik SCO Rongjeng da kaba ka la jop 3-2 kol ha ka Group-G. Kane ka la wan lyngba u Tremarchwal Ch Marak (2′), Bris Taro (43′) bad u Santosh Teron (55′), hynrei u Keri G Momin (45′, 49′) u la lah ban pynphai kylla ar kol na ka bynta ka ASCOR.
Khatduh ha ka jingïalehkai jong ka Group-H hapdeng ka Seng Samla Umdang Pyllun bad ka Mawten SC ki la ïakhaid mar 1-1 kol ha Mawkyrwat. U Rangkyn-saistar Mawsor, uba la long u nongthep ha ki saw tylli ki jingïa -lehkai jong ka Umdang Pyllun, u la thep kol nyngkong ha ka minit kaba 36, hynrei u Oversharp Iawphniaw (75′) u la lah ban pynïakhaid kylla ha ka kylla miet.
Ha ka sngi Balang kan don tang kawei ka jingïalehkai ha ka Group-G, hapdeng ka Attong Matgrik FC bad ka Janepih YSCA ha ka por 3 baje nohphai sngi ha Williamnagar.
