Nongpoh, Ïaïong 28
U Myntri Rangbahduh ka ri, u Narendra Modi ha ka sngi Ba-ar u la plie paidbah ïa kumba hynriew tylli ki Indoor Cricket Academy jong ka thaiñ shatei lammihngi ka ri India lyngba ka online programme kaba la pynlong ha nongbah Gangtok bad kawei na kine kadei ka shlem ai jinghikai jong ka Meghalaya Cricket Association (MCA) kaba la lah ban tei pura ha Madan Kurkalang, Ri Bhoi District.
Ki san tylli kiwei pat ki jylla ka thaiñ shatei lammihngi ki kynthup ïa ka Sikkim, Mizoram, Nagaland, Arunachal Pradesh lem bad ka Manipur bad ïa kitei ki Indoor Cricket Academy la tei ha ka jinglut kaba T. 23 klur kawei.
Ka jingïoh ban plie paidbah ïa katei ka Academy ka MCA ha Madan Kurkalang la khmih lynti ba kan lah ha ka ban kyntiew shikatdei ïa ki khun samla kiba don sap ha ka jingïalehkai kriket da kaba ai rynsan ïa ki ba kin ïoh ban shah hikai pyntbit, khamtam ha ka aïom slap ba kim lah ban kilanmet ha ki madan ïalehkai.
Katei ka Indoor Cricket Academy kaba don ha madan Kurkalang ka don ruh ha ka ïa ka pung jngi, ka High Performance Fitness Center, ki jaka ïalehkai ne ki Indoor Practice Pitch nalor ki jaka khreh jong ki nongïalehkai kynthei bad shynrang, ki jaka shong lem bad kiwei de ki jingdonkam kiba ïahap dur katkum ka juk kaba mynta.
Haba kren sha ki lad pathai khubor, u Vice President ka MCA, u Bah Rajiv Bareh ula pynpaw ïa ka jingsngewnguh kyrpang ïa u Myntri Rangbahduh ka Ri, u Narendra Modi uba la plie paidbah ïa kine ki academy ka thaiñ shatei lammihngi kumjuh ruh ïa ka jong ka MCA kaba don ha Madan Kurkalang. U la pynpaw ruh ïa ka jingai burom kaba kyrpang ïa u Naba Bhattacharjee lem bad u Bah Gideon Kharkongor, kiba dei President bad Secretary barim jong ka MCA halor ka jingbuddien ka jong ki ban pynurlong ïa kane ka kam kumba ka long haduh mynta bad ruh ïa u Secretary ba mynta ka MCA, u Bah Rayonald Kharkamni.
Na ka liang u Bah Macdonald Sawian, President ka Shillong Cricket Association (SCA) uba dei ruh ha kajuh ka por kum u dkhot ka Ground Searching Committee ka MCA u la ong ba ha ka jingshisha ïa kane ka Academy la thmu nyngkong ban tei ha madan Polo, hynrei namar ka jingkhapngiah ka jaka la pynkynriah noh. U la ïathuh ba hadien ka jingjurip ïa kumba 20 tylli ki jaka, ka Dorbar Shnong jong ka Lumdaitkhla Bhoirymbong ka la mih shakhmat ban aiti ta katei ka Madan Kurkalang na ka bynta ban tei ïa katei ka projek hapoh ka jingshim wai kaba la ïakut kumba 50 snem kynthih.
Ha kane ka sngi plie paidbah ïa kane ka Academy, la wan ban ïadon ryngkat ruh u President ka MCA, u James PK Sangma, u Bah Rayonald Kharkamni, Secretary nalor kiwei kiwei de ki nongïalam barim ka MCA lem bad ki nongïalam na ki synjuk ïalehkai jong ki District bapher bapher jong ka jylla.
