Agartala, ïaïong:
Ka bynta ba nyngkong jong ka jinglum khana samari jong u 2027 kan sdang kumba la pyntikna ha Tripura naduh ka 17 tarik u Naitung bad kan bteng haduh ka 31 tarik u Nailar, la ïathuh ki heh sorkar ha ka 28 tarik, Ïaïong.
Katkum ka jingong u Director ka tnad Census Operations u Ratan Biswas, kane ka kam kan long ha ki ar tylli ki bynta. Ka bynta kaba nyngkong, naduh ka 17 haduh ka 31 tarik u Naitung, kan ailad ïa ki nongshong shnong ban jied ban kheiñ hi dalade. Hadien kane yn bud sa ka bynta kaba ar naduh ka 1 tarik haduh ka 31 tarik u Nailar, ha kaba ki nongkheiñ briew kin leit jngoh ïa ki ïing ban pyndep ïa ka jingpynrung kyrteng ïa ki ïing bad ka jinglum jingtip.
Kane ka jinghikai kaba 45 sngi kan kynthup ïa kumba 11,000 ngut ki nongkheiñ bad ki nongpeit ha kylleng ka jylla ban pyndep ïa ka bynta ba nyngkong jong ka jingkheiñ.
Ban pynthikna ba ka jingpyntreikam kan long kaba ïaid beit ïaid ryntih, la pynlong ïa ka jingïalang ha ka kyrdan jong ka jylla halor ka Khanasumari 2027 ha Pragya Bhavan, ha kaba la ïashim bynta da ki heh ophisar ba kynthup ïa ki District Magistrate na baroh 8 tylli ki distrik.
Ki heh sorkar ki la ïathuh ba ki District Magistrate kin treikam kum ki Principal Census Officer ha la ki jong ki jong ki distrik, katba ki Additional District Magistrate bad ki Sub-Divisional Magistrate ruh kin don ka bynta kaba tyngeh ha kane ka jingpyntreikam.
Haba pynpaw ïa ka jingkylla kaba khraw, u Biswas u la ong ba ïa ka jingkheiñ briew jong u snem 2027 yn pynlong pura ha ka rukom digital, kaba pynduh ïaki kot ki sla bad ki jingsoi.
Ki nongkheiñ kin lum ïa ki jingtip lyngba ki tiar mobile, ïa kiba yn buh beit beit sha ka Central Server ha ka por ba dei.
Kane ka sienjam ka long ban pynbha ïa ka jingtreikam, ka jinglong thikna, bad ka jinglong kaba shai ha ka rukom kheiñ briew ha ka ri baroh kawei.
