Shillong, Ïaïong 29
U Myntri ka tnat ïalehkai u Bah Wailadmiki Shylla u la ong ba ka Sorkar Jylla ka dangap ïa ka jingïarap pisa na ka Sorkar Pdeng khnang ban lah ha ka ban pyndep pura ïa ki jingtei na ka bynta ka 39th National Games ka ban long ha u 2027 hapoh ka Jylla.
“Ngim shym la kheiñ sting, kumta ngi la pynkhreh pura bad dei na kata ka daw ba phi la ïohi ba ngim shym la ap ïa ka jingmynjur na ka Sorkar Pdeng, ngi la ïaid shakhmat ban pynlut da ka pisa jong ka Jylla na ka bynta kino kino ki jait jingtei bad na ka bynta kino kino ki jingdonkam halor ka National Games,” u la bynrap.
U la bynrap ba ki jingbishar bniah na ka tnad ïalehkai jong ka sorkar pdeng ki la long kiba ïaid beit ïaid ryntih.
“Ha kine ki khyndiat bnai ba la lah, u Secretary jong ka tnad ïalehkai jong ka Sorkar Pdeng u la wan sha kane ka Jylla na ka bynta ka jingïalang bishar bniah bad u la leit jngoh ruh ïa ki jaka bad u la sngewkmen ruh shibun eh bad ha u bnai ba la lah, u Commissioner & Secretary jong ngi ryngkat bad ki ophisar ki la ïakynduh ïa u myntri ka tnat ïalehkai ka Sorkar Pdeng. Nga lah ban ong ba kane ka jingpynkhreh ka la ïaid beit shakhmat.”
Utei u Myntri u la pynpaw ïa ka jingkyrmen kaba skhem ban pynlong ïa katei ka lympung kaba heh ha ka ri kaba jop.
“Nga sngew thikna bad sngewskhem ba da kano kano ka jingkyrshan kaba ngi ïoh na u Myntri Rangbah ka jylla bad na kiwei ki tnad treikam, ngin lah ban pynïaid beit ïa kane ka National Games bad ka ban pynsah kynmaw,” u la bynrap.
Halor ki nongïalehkai, u Bah Shylla u la ong, “Kaei kaba ngi kwah ka long ban ym tang ban shu pynlong ïa kane ka lympung, hynrei kaei kaba ngi angnud ka long ba ngi kwah ban ïohi ba ki nongïalehkai jong ngi kin wan ban ïalehkai bha bad ban wanrah burom ïa ka Jylla hi baroh kawei.”
Shuh shuh u la ong ba ka Sorkar Jylla ka la pynkhreh ïa ka ‘Direct Appointment Policy’ ne ka bhah kam kyrpang na ka bynta ki nongïalehkai kiba la lah ban wanrah burom ïa ka Jylla.
“Naduh u snem ban wan, kino kino ki nongïalehkai kiba lah ban khur takma na ka National Games kin ïoh da ka kam sorkar. Kane ka long ka jingpynshlur ban ai mynsiem ïa ki nongïalehkai bad kumjuh ïa ki kmie ki kpa kiba kyrshan ïa ki.”
U Bah Shylla u la ïathuh ba la pyllait ka mang pisa sha ki synjuk ïalehkai ban pynkhreh ïa ki kynhun ïalehkai na ka bynta katei ka lympung ka la sdang ban seisoh.
“Naduh u snem ba la dep ngi la pyllait T.39 klur na ka bynta ka jingpynkhreh ïa ki kynhun, bad kine ki jingthmu ki la sdang ban urlong lyngba ka jinglah ban ïalehkai bha ha ka Khelo India Games kaba la kut dangshen. Ha u snem ba la lah, ka Meghalaya ka la wan ha ka kyrdan ba 29 ha ka India Khelo Tribal Games, hynrei mynta u snem ngi la lah ban kynjoh sha ka kyrdan ba 13.”
“Ngin dangïai bteng ban trei shitom bad ngin dangïai kyrshan ïa ki nongïalehkai bad nga thikna ba ha u snem ban wan, ngin sa lah ban kynjoh sha ka thup kaba san bad kyrmen ba ngin sa lah ban jam sha ka kyrdan ba hakhlieh”, u la bynrap.
