Shillong, Ïaïong 29
Ka Paris Saint-Germain bad ka Bayern Munich ki la lah ban pyni ïa ka mynsiem ïakhun ha ka semi final jong ka Champions League ha kaba ka PSG ka la pynliem noh ïa ka Bayern da 5-4 kol ha ka sngi Balang ha Paris.
Kane ka jingïakhun semi final ka la long kaba kham phylla ha kaba baroh ar ki kynhun ki la lah ban thep kol bun bad ki la lah ban ïalehkai bha naduh kaba sdang.
U Harry Kane u la ïoh ban thep kol nyngkong na ka bynta ka Bayern lyngba ka penalty ha ka minit kaba 17 hashwa ba u Khvicha Kvaratskhelia (24) un pynïakhaid kylla na ka bynta ka PSG.
Hadien shiteng kynta katei ka kynhun ba khlaiñ bor na Paris ka la pynbud ïa ka kol kaba ar lyngba u Joao Neves (33), hynrei u Michael Olise u la lah ban pynphai na ka bynta ban ïakhaid mar 2-2 kol. Ka PSG ka la ïoh ban thep biang na ka bynta ban tam da shi kol hashwa ban kut ka jingïalehkai jong ka kylla step lyngba ka penalty ba la shut da u Ousmane Dembele.
Hadien katto katne por ba la bteng ïa ka jingïalehkai jong ka kylla miet, u Kvaratskhelia (56) u la thep biang ïa ka kol kaba ar lem bad u Dembele (58) na ka bynta ban pynlong ïa ka PSG ban tam da 5-2 kol.
Kumba ka paw u Kvaratskhelia sa shisien pat u la lah ban ïalehkai bha na ka bynta ka PSG bad u la long uba kynsai ha ka Champions League mynta ka aïom.
“Nga thikna ba baroh kiba sakhi ïa ka jingïalehkai katno kin da itynnad ïa ka jingïalehkai. Ka long kaba sngwtynnad ban ïalehkai ha kum kane ka jingïakhun,” la pynpaw u kapten ka PSG u Marquinhos hadien ba la kut ka jingïalehkai.
Hapdeng kane ka jingshah thep kol, pynban ki rangïalehkai ka Bayern kim shym la kynran dien ha kaba ki la lah ban pynphai kylla ar kol lyngba u Dayot Upamecano (65) bad u Luis Diaz (68) hashwa ba kan shah rem da 4-5 kol.
Watla ka shah rem, ka Bayern ka don jingkyrmen ban ïalehkai bha ha ka jingïakhun ka wat kaba ar (2nd leg) ha la ïing ka ban long ha Munich ha ka 7 tarik u Jymmang.
“Ngi la ïakhun tyngeh bad sa khyndiat ngi la jan lah ban pynïakhaid,” la ong u Kane.
Ka kynhun ka ban khur ïa ka jingjop kan ïoh rung sha ka final jong ka Champions League ka ban long ha Budapest ha u bnai ban wan.
