Shillong, Ïaïong 29
Ka Mawlai Sports Club ka la mad ïa ka jingshah rem ha ka Sunrise Club Orissa da 3-1 kol ha ka lympung ïalehkai I-League 3 2025-26 ha ka sngi Balang ha Khuman Lampak Stadium kaba ha Imphal, Manipur.
Kane ka kynhun ïalehkai ka nongbah kaba la rah teng ïa ka Meghalaya State League, ka la lah ban khur jingjop ha kaba nyngkong da kaba pynliem ïa ka Sikkim Brotherhood FC da 3-1 kol, hynrei ha kane ka jingïakhun kaba ar jong ka Group-A kam shym la lah ban pynurlong bad u Ricky Chyne u la shah beh na madan.
Ha kane ka jingïakhun ka Sunrise ka la ïoh ban pynkhih jar nyngkong lyngba u Sanjit Khora ha ka minit kaba 22 bad ka la tam shi kol ha ka kylla step.
Watla ka Mawlai ka la hap ban ïalehkai sa tang shiphew ngut ki rangïalehkai na ka daw ka jingshah sei red card u Ricky Chyne (59′), hynrei u Wadshwa Latoo (65′) u la lah ban pynïakhaid kylla.
Hadien katto katne por ka Sunrise ka la ïoh ban thep biang ïa ka kol kaba ar lyngba u Arpan Lakra (66′) bad ïa ka kol kaba khatduh la thep da u Arbin Lakra (80′) na ka bynta ban khur syndon ïa ka jingjop.
Ka Mawlai kan pynkhreh ïa ka jingïakhun kaba lai pyrshah ïa ka ARA FC ha ka 3 tarik u Jymmang bad ïa ka Raengdai ha ka 5 tarik.
