Shillong, Ïaïong 29
U Rishembhalang Wan-ñiang bad u Akhebor Langrin ki la khur ïa ki hat-trick na ka bynta ban pynlong ïa ka Janepih YSCA ban khur biang ïa ka jingjop da kaba ka la lah ban pynliem noh ïa ka Attong Matgrik FC ha ka jingïalehkai jong ka Group-G ha ka 5th Meghalaya State League kaba la long ha ka sngi Balang ha Williamnagar.
Ha kane ka jingïakhun u Rishembhalang (38′, 74′, 90′) bad u Akhebor (10′, 41′, 45′) ki la lah ban khur ïa kitei ki hat-trick ban pynlong ïa ka Janepih kum ka kynhun kaba khlem shah rem ha ki san sien ïakhun.
Kane ka long ka jing-jop kaba kham heh bad ka Janepih ka danglong ka kynhun kaba khlem pat shah thep wat tang shi kol ruh ha kane ka lympung, katba ka Attong Matgrik kaba dangsah ha ka kyrdan ba shatrai, ka la mad ïa ka jingshah rem kaba saw na ki san sien ïakhun.
Ka la don ka jingpynkylla ha ka prokram ïalehkai ha kaba ki jingïalehkai jong ka Group-A kiba la thmu ban pynlong ha ka sngi Thohdieng bad sngi Saitjaiñ, yn pynlong noh mynta ka sngi Palei ha SSA Stadium, Shillong. Ha ka por 1 baje mynsngi ka Mawshun SCC kan ïakynduh pyrshah ïa ka Khimusniang SC bad ha ka por 5 baje janmiet ka Nongkseh SSCC kan ïakhun pyrshah ïa ka Umkaber SC. Ha William-nagar, ka Balmanduri FC kan ïakhun pyrshah ïa ka Maram FC ha ka por 3 baje nohphai sngi.
