Khliehriat, Ïaïong 29
Ka District Level Inter School Athletic Meet 2026 kaba lai sngi lynter ba la pynlong da ka shlem treikam jong ka District Sports Officer (DSO), East Jaiñtia Hills ryngkat ka jingïatreilang bad ka East Jaiñtia District Sports Association (EJHDSA), ka la sdang ha ka sngi Balang ha madan Teilang, Dkhiah Hills West ha kaba la wan shim bynta da 30 tylli ki skul na kylleng kane ka district.
Ïa kane ka lympung la plie da u District School Education Officer (DSEO), East Jaiñtia Hills District, Bah R. Diengdoh ha ka jingïadon lang ka DSO ka East Jaiñtia Hills ka Kong Stephanie M Rapsang, ki principal, ki nonghikai, ki khynnah skul bad kiwei kiwei.
Haba ai jingkren ha kane ka sngi u Bah R. Diengdoh u la pynpaw ba ka jingïalehkai kam dei tang ka jingjop takma, hynrei ka dei ruh ban tei ïa ka akor, bad ka jinglong. U la pynpaw ïa ka jingdonkam ban ïashim bynta ha ki jingïalehkai kaba long ruh kum ka rynsan kaba hikai ïa ki khynnah kumno ban ïakynduh ïa ki jingeh, ban kiew hadien ka jingshah rem bad ban burom iwei ia iwei pat.
Katto katne ki jingïalehkai ba la pyndep ha kane ka sngi sdang ki long ha ka Under-18 Girls Long Jump la jop da ka Samjana Phawa na Sein Raij Tuber HSS, ïa ka kyrdan ba-ar la ïoh da ka Gracy Rasmut na Sanshnong SS bad balai ka Hawana Dkhar na Shamsham SS.
Ha ka Under-16 Boys jong ka Shot Put, u Reform Dkhar jong ka Shamsham SS u la khur ïa ka jingjop, ba-ar u Jame Pdein jong ka Sanshnong SS bad balai u Saviournass Rymbai jong ka Byndihati SS.
Ha ka Under-18 Boys High Jump, la jop da u Teibokmi Pdein na Sanshnong SS, bud sa u Rooneybert Dkhar na Wapung HSS bad balai u Give Me Well Dkhar na Shamsham SS.
Ha ka Javelin Throw la sakhi ruh ïa ka jingïakhun kaba tyngeh, ha kaba ka Smiling Dkhar jong ka Sanshnong SS ka la khur ïa ka jingjop ha ka Under-16 Girls, katba ka Phiang Dkhar bad ka Nipaya Dkhar ki la wan ha ka kyrdan ba-ar bad balai.
Ha ka Under-18 Girls Javelin Throw, ka Sathi Phawa na ka Sanshnong SS ka la khur ïa ka jingjop, bud sa ka Pawlisa Dkhar jong ka Shamsham SS bad balai ka Bhaki Sana jong ka Sein Raij Branch UP School.
