Guwahati, ïaïong:
Ka kynhun jong ki pulit jong ka Chhattisgarh kaba don saw ngut, kynthup ïa uwei u Inspector, ki la shahkem bad shah kylli jingkylli ha ki pulit ka Guwahati hadien ka jingkynnoh ba ki la bam tyngka ha kaba ïadei bad ka kam runar ha ka cyber, la ïathuh ki heh pulit hynnin ka sngi.
Ïa kane ka jingjia la pynngat pyrshah ïa ka kynhun pulit jong ka Raipur ha Dispur Police Station ha Guwahati, hadien ka jingujor ba kine ki pulit ki la dawa bad bam pisa na ki briew kiba la shah kynnoh bad shahkem halor ki kam runar ha Cyber ha ka por ba ki la shah tohkit.
Katkum ka jingïathuh jong uwei u heh pulit, la ong ba kane ka kynhun jong ka Raipur, ka la poi ha Guwahati, ha ka sngi U Blei, ha kaba ïadei bad ka jingjia Cybercrime ha Chhattisgarh.
Ki la kem ïa uwei uba shah kynnoh na Bihar bad hadien ki la kem sa ïa lai ngut kiwei pat, kiba dei ruh na Bihar, ha Guwahati ha ka lah sngi U Blei.
Ka kynhun, kaba kynthup ïa uwei u Inspector, uwei u Head Constable bad arngut ki Constables, ki la shah kynnoh ba ka la pyllait ïa arngut na kiba shah kynnoh hadien ba la kynnoh ba ki la pdiang ïa ki pisa tuh, katba ïa uba lai pat u dang set ha phatok haduh ban da siew ïa ka pisa kaba dang sah.
“Ngi la ïoh ïa ka jingujor na ki arngut kiba shah kynnoh ba la pyllait. Da kaba pynshong nongrim ïa kane, ngi la shim khia bad la shim ïa ka kynhun baroh kawei bad la wanrah sha Dispur police station hynnin ka miet”, la ong une u heh pulit.
Ki pulit ki la ïathuh ba la buh jingujor ejahar hapoh ki kyndon ba lah ban ai jamin, hadien kata la shah ïa ki briew ban mih noh da kaba pynbna hadien ba la tohkit shwa. La bthah ïa ki ba kin leit mih biang ban shah tohkit bniah.
“La ai jingtip ïa ka kynhun bad la bthah ban leit mih hynnin ka sngi na ka bynta ban pynlong ïa ka jingtohkit kaba bniah”, la bynrap biang une u heh pulit.
Ha kajuh ka por, ïa une uba la shah kynnoh marwei uba la leh ïa ka kam runar ha ka cyber la pyllait noh ha ryngkat ka jingïateh kular. Ki tyllong khubor ki la ïathuh ba ka jingtohkit ka dang ïaid shakhmat, bad ka jingpyntreikam kaba kham bniah kan shong ha ka jinglap jong ka jingtohkit.
