Imphal, ïaïong:
U heh nongïalam jong ka Manipur Congress, u Okram Ibobi Singh, ha ka 29 tarik, Ïaïong, u la kynthoh ïa ka sorkar pdeng ba ka ïashim bynta ha ka “propaganda politics” halor ki mat kum ka jingpynbeit pud bad ka Women’s Reservation Bill, ha kaba u la kyntu ïa ka sorkar ba kan buh hakhmat eh ban wanrah biang ïa ka jingshong suk shongsaiñ ha Manipur.
Haba kren ha ka jingïalang bad ki nongthoh khubor ha Congress Bhawan ha Imphal, u heh ka Manipur Pradesh Congress Committee (MPCC) u la kynnoh ba ka sorkar synshar ka wanrah ïa ki aiñ ba kongsan watla kam don ïa ka jingbun paid kaba ar bynta na ka lai bynta kaba donkam katkum ka Riti synshar ka ri kaba donkam na ka bynta ban pynkylla ïa ka Riti synshar.
“Katkum ka Riti synshar ka ri, kano kano ka jingpynkylla ka donkam ïa ka jingkyrshan jong ym duna ïa ka ar bynta na ka lai bynta jong ki dkhot ka ïingdorbar kiba shong dorbar. Kumba ka long mynta ka sngi, ka sorkar kaba synshar kam pat don ïa kata ka jingbun paid. Ki tip ba kine ki bill kin shah rem noh”, la ong u Ibobi Singh.
U la kynnoh shuh shuh ba ka sorkar pdeng ka pyndonkam ïa kum kine ki aiñ na ka bynta ka jingpynbna khubor saiñ pyrthei ban ïa ka jingpynkylla kaba shisha.
“Lada mynjur ïa kane ka bill, kin dawa ïa ka jingmyntoi na ka bynta ka jingpynkupbor ïa ki kynthei. Lada kam urlong kin kynnoh ïa ka Congress bad ki seng pyrshah, da kaba ong ba ki pyrshah ïa ka jingpynkupbor ïa ki kynthei. Kane kam dei kaei kaei hynrei ka jingthmu kaba thmu ban ïalam bakla ïa ki paidbah”, u la bynrap.
U nongïalam ka Congress u la khot ïa u Narendra Modi, u Amit Shah bad ïa ka sorkar jylla ban pynleit jingmut ha kaba weng ïa ka jingeh kaba la slem bha ha Manipur ha ka jaka ban bud ïa kaei kaba u la khot kum ki jingïathuhkhana saiñ hima sima kiba pynpait bad pynïapher.
Haba pynpaw ïa ka jinglong jingman jong ki briew ha ka jylla, u Ibobi Singh u la kam ba ki briew ha Manipur ki dang ïai bteng ban shah shitom la palat lai snem hapdeng ki jingkulmar kiba dang ïai bteng.
“Ki la don palat 300 ngut ki briew kiba dang jah rngai, bad ym pat tip ïa ka jaka sah jong ki. Palat 60,000 ngut ki briew ki dang ïai bteng ban sah ha ki jaka ai jingïarap. Kine ki dei ki mat kiba donkam ban shimkhia kyrkieh”, u la ong.
U la ban jur ruh ïa ka jingdonkam ban don ka jingïakren kaba kynthup lang ïa baroh ki jaitbynriew kiba shah ktah, kynthup iï ki kynhun Meitei, Kuki, bad Tangkhul, bad u la kyntu ïa ka sorkar ban pyrshang da kaba shisha sha ka jingpynïasuk bad ka jingtei ïa ka jingsuk.
“Ha ka jaka ban wad ïa ka jingshah jied kaba remdor lyngba kum kine ki jingïathuhkhana, ka sorkar ka dei ban shim ïa ki sienjam kiba skhem ban pynbeit ïa ki jingeh hapdeng ki jaitbynriew bad ban pynphai biang ïa ka jingsuk khlem da pynslem shuh,” u la bynrap.
