Shillong, Ïaïong 30
Ka Nongkseh SSCC bad ka Khimusniang SC ki la lah ban pynthikna na ka bynta ban jam sha ka pre-quarter final jong ka 5th Meghalaya State League hadien ba ki la lah ban khur jingjop ha ka Group-A ha ka sngi Palei ha SSA Stadium.
Ha kane ka jingïakhun, ka Nongkseh ka la lah ban pynliem ïa ka Umkaber SCC haduh 16-0 kol, katba ka Khimusniang ka la jop da 3-1 kol ïa ka Mawshun SCC. Ha kawei pat ka jingïalehkai jong ka Group-G ka Maram FC ka la pynliem noh ïa ka Balmanduri da 5-1 kol ha Williamnagar.
U Kitboklang Pale u la khur syndon da ar tylli ki hat-trick da kaba u la thep marwei haduh 6 kol na ka bynta ka Nongkseh ha ka minit kaba 32, 35, 39, 54, 75 & 82. Ïa kiwei pat ki hat-trick la thep da u Shano Tariang (69′, 89′, 90’+2) bad u Chesterpaul Lyngdoh (33′, 52′, 79′). Kane ka long ka hat-trick kaba lai na ka bynta u Chester ha ki san sien ïakhun. U Hardy Cliff Nongbri (66′, 90′) u la thep ar kol bad la pynbud ïa kawei pat da u Pynbhalang Suting (76′). Ka Umkaber ka la ïarap thep kol ïa ka Nongkseh ha ka minit kaba 10.
Kham hashwa ka Khimusniang ka la ïakhun tyngeh pyrshah ïa ka Mawshun. U Meroily Lytan (10′) u la pynkhih jar nyngkong eh na ka bynta katei ka kynhun kaba na West Jaiñtia Hills, hynrei u Restorewell Marba-niang (72′) u la lah ban pynïakhaid kylla na ka bynta ka Mawshun ha ka kylla miet. Hadien katto katne por ka Khimusniang ka la thep kol biang ha ka minit kaba 75 lyngba ka free-kick ba la shut da u Civility Khongmalai, hashwa ba un pynbud ïa ka kol kaba ar ka jong u ha ka minit kaba 78 na ka bynta ban khur syndon ïa ka jingjop.
Lyngba ka jinglah ban kamai 15 bad 12 poiñ, ka Nongkseh bad ka Khimusniang ki la wan ha ka kyrdan ba nyngkong bad ba-ar jong ka Group-A, hynrei ïa ka rai ban ïaknieh bat ïa ka kyrdan ba hakhlieh kan shong ha ka jingïalehkai kaba kine ki kynhun kin ïakynduh ha ka 6 tarik mynta u bnai.
Haba phai sha ka jingïalehkai ha Williamnagar, U Bris Taro (63′, 73′, 83′) u la long u rangthep kol ba kynsai ban khur ïa ka hat-trick, ryngkat u Tremarchwal Ch Marak (37′) bad u Easter Salchang Ch Sangma (90′) ki la thep mar shi kol na ka bynta ka Maram. Ka Balmanduri ka la lah ban pynphai kylla shi kol lyngba u Chichang M Momin (71′). Ka Balmanduri ka la wan ha ka kyrdan basaw napdeng ki san tylli ki kynhun kiba don ha ka Group-G.
