Shillong, 01 Jymmang
Ka rynsan ïakura kaba la tip ïa ka kum ka State Boxing Championship 2025-26, ka la poi noh sha kaba kut hynnin ka janmiet, ha Mawlai Mawroh, lyngba kane ka rynsan, la sei madan pat ïa kawei ka khana ne ka parom jong ka jingkhreh ban mihpaw ki rang bad ki thei ïakura ba kynsai ki ban long pat ka lawei kaba phyrnai ïa ka Jylla hi baroh kawei.
Kane ka rynsan ïakhun kaba saw sngi lynter, kadei kaba la pynïaid da ka Meghalaya Boxing Association (MBA) bad la kyrshan pat da ka tnat jong ka Directorate of Sports and Youth Affairs.
Kumban shu pynkynmaw ba ha kane ka rynsan ïakhun la kiew rynsan haduh 105 ngut ki ‘rang bad ‘thei ïakura na 8 tylli ki district bad kumjuh na ki klob, ïa kane ka rynsan ïakhun la pynlong na bynta ki khynnah shynrang bad kynthei kiba 15-16 snem bad 17-18 snem ka rta.
U kongsan ba la wan ban sakhi lang ïa ki katto katne tylli ki jingïakhun phainal dei u MLA jong ka Mawlai u Bah Brightstarwell Marbaniang bad don ryngkat lang u Lakshay Sharma uba la wan ban mihkhmat na ka bynta ka Delhi Public School bad ka SHAIL Group.
Ha kaba kut jong kane ka jingïakob, saw tylli ki nam ‘rang bad ‘thei ïakura ba kynsai (Best Boxer) la ïoh ban nam ha kane ka janmiet, kynthup ïa ka Evangellyne Sohbar napoh Ri-Bhoi bad u Damonlang Marbaniang ka Green Heart Boxing Club kiba la rah ïa kane ka nam ha ka kyrdan ïakhun jong ki junior.
Katba ka Ekyrpangmeki Sohiong jong ka Ri-Bhoi bad u Amethyst Synnah ka West Jaintia Hills ki la rah ïa kane ka khusnam ‘rang bad ‘thei ïakura ba kynsai (Best Boxer) ha ka kyrdan jong ka Youth.
Katba ka khusnam Emerging Boxer jong kane ka rynsan ïakhun la ïoh rah da u Casbe K Marak ka West Garo Hills.
Haba phai sha ki phainal jong kane ka rynsan ïakhun man kawei pa kawei ka jingïakhun ka long kaba ïabiang bor, bad ïakhaid bha, katno tam lei lei ha ka por ka jingïakhun phainal jong ka kyrdan ïakhun ‘youth category’, ha kaba saw na ki 6 tylli ki jingïakhun ki la kut noh ha kaba u nongpynïaid ne referee u la hap ban pynsangeh noh hi dalade ïa ka jingïakhun.
Kumba ka long ïa mynta, na ka liang ka MBA ka la lum la lang kumba 45 ngut ki ‘rang bad ‘thei ïakura ki jong ka, ki la don hapdeng ka jingpynkhreh kaba janai bha ïalade ban mihkhmat ïa ka Jylla ha ka por ba kan sa pynlong ïa ka lympung National Games ha u snem ban wan, ïa kaba na kane ka rynsan ïakhun, lehse ka MBA kan sa lah ba kan nang pynrung shuh shuh ïa la ki ‘rang bad ‘thei ïakura sha kane ka kynhun pynkhreh ïakhun ha ka Nationals Games.
