Shillong, Jymmang 01
Ka Seng Samla Umdang Pyllun ka la weng noh ïa ka jingeh jong ka ha ka 5th Meghalaya State League da ka kol ban pynliem noh ïa ka Rangdajied United kaba dei ka nongjop jong u snem 2023 da 2-1 kol ha ka Group H ha ka jingïalehkai ha Mawkyrwat mynta ka sngi.
Ka Rangdajied ka la sdang lehkai bha da ka kol kaba la thep da u Elnathan D Wahlang ha ka minit kaba 15 hynrei ki artylli ki kol kiba stet ha ka kylla miet ki la pynthut ïa ka jingïalehkai. Ka kol kaba nyngkong na Umdang Pyllun la thep da u Rangkynsaistar Mawsor (59′) bad hadien saw minit u Wanbhalang Mawsor (63′) u la pynlah ïa ka kynhun jong u ban lam khmat. U Rangkynsaistar u dei u nongthep kol ba bun tam jong ka Group H da kaba thep hynriew tylli ki kol haduh mynta na ki san tylli ki jingïakhun ka kynhun jong u.
Kane ka jingjop ka la pynphai kylla ïa ka kynhun, ha kaba ka Umdang Pyllun ka la kiew sha ka kyrdan ba ar ba shipor, watla ka Mawlarshong SC ka dang sahdien tang 2 poiñ bad ka jingïalehkai ka ban dang don. Ka RUFC ka dei ka klob kaba nyngkong eh kaba don ha Shillong ban shah rem ha kane ka samoi bad ka don ka jingma kaba shisha ba kan nym lah ban rung sha ki jingïakhun ïalehkai pre-quarter final.
Kam shym la don satia kaba kum kata ka jingeh na ka bynta ka Shillong Lajong FC ka lahduh jong u snem 2019, ka Lajong kala jop da 7-0 kol ïa ka Iatyllilang Lumsehkot CSC ha ka Group E ha Wahiajer. Da kane ka jingjop, ka Lajong ka la rung sha ka wat kaba bud.
Ki ‘rang thep kol ka Lajong ki long u Lalmuansanga (12′, 30’P), U Hamedamanbha Wahlang (28′), U Riborlang L Lyngkhoi (35′), U Samchaphrang Lato (39’) bad ka jingïoh thep kol sha lade ka kynhun pyrshah ha ka minit ba 23 kala pynlong ïa ka Lajong ban lamkhmat da 6-0 kol ha ka kylla step bad u ‘rang bujli u Emanbha Marbaniang (90’+3) u la ïoh thep kol ha ka kylla miet.
Ha ka jingïakhun ha Mairang, ka Langsning FC ka la pynliem ïa ka Lawbah SC da 9-0 kol ha kawei pat ka jingjop ba shyrkhei ha ka Group F. Ki nongïalam ka kynhun kiba la ïaid ruh sha ka pre-quarter final, ki kol la thep da u Samuel Phawa (10′, 36′), u Damonlang Pathaw (12′, 50′), u Donlad Diengdoh (27′, 32′), u Dajiedlang Wanshnong (32′), u Ronneychel Khongrangjem (38′) bad u Nelson Rymbai (79′). U Nelson Rymbai u la lamkhmat ha ka jingïakhun ban long u ‘Top Scorer’ ha ka MSL 5 bad u la thep haduh 12 kol haduh mynta.
Uba la ïasoh lang bad u Nelson ha ka jingthep shi kol u dei u Keri G Momin (11′, 38′, 73′) ha ka Group G. U la ïoh biang sa shisien ka hat-trick mynta ka sngi ha kaba ka A’chik SCO Rongjeng ka la pynliem noh ïa ka Attong Matgrik FC da 5-0 kol ha Williamnagar. Kiwei pat kiba thep kol ki long u Preioush N Sangma (12′) bad u Washbi Sangma (51′).
Ha kawei pat ka jingïalehkai ha Khliehriat ka Rymbai Shkenshynriah SC ka la pynliem ïa ka Thangskai Tiger da 3-0 kol. Baroh ar tylli ki kynhun ki la buh jaka ha ka pre-quarter final wat shuwa katei ka sngi hynrei ka Shkenshynriah ka la long ba nyngkong na ka Group D. Ki nongïathep kol ki long u Skilful Tariang (3′), u Alwinson Bareh (56′) bad u Hesmiki Rymbai (78’P).
Kawei pat ka jingïakhun mynta ka sngi na ka Group B ha madan MFA jong ka Shillong ka Mawlum Tyrsad SCC ka la jop ïa ka Mulang SC Nongbah da 6-0 kol. U Ebetstar Nongbet (48′, 71′, 75′), u Banshem Khongsit (8′), u Fillbanstar Nongbet (86′) bad u Justlywell Jala (87′) ki la long ki nongthep kol. Watla ka dang sah ha ka kyrdan kaba lai, hynrei ka Mawlum Tyrsad ka dang don ka lad ban poi sha ka kyrdan kaba ar la da ka lah ban jop ïa ka Mawphu SC.
Ka Laskein SCSC ka la pynliem ïa ka Amlarem SC da 2-1 kol ha ka Group C ha Amlarem.
