Mawkyrwat, Jymmang 01
Ka skul Nativity Higher Secondary School, ka la rah biang ïa ka nam lahduh ha ka lympung ïalehkai Athletic jong ki khynnah skul kaba tip kum ka 12th District Level Inter – School Athletic Meet 2026 ba la pynïaid da ka ophis jong u District Sports Officer, South West Khasi Hills District bad ka South West Khasi Hills District Athletic Association.
ïa kane ka lympung kaba lai sngi la sdang ïa ka ha ka 29 tarik u Ïaiong 2026 bad ïoh ban pynkut mynta ka sngi ka 1 tarik u Jymmang 2026 ha madan Rowel Lyngdoh Stadium, Mawlangwir, South West Khasi Hills District.
Ïa ka nam Overall Team Champion jong une u snem la ïoh ka skul Nativity Higher Secondary School kaba la ïoh ban khur haduh 14 tylli ki takma ksiar, 9 tylli ki takma Rupa bad 8 tylli ki takma Rnong , katba ïa ka best March Past jong une u snem la ïoh da ka Little Star Higher Secondary School, ba ar ka Nativity Higher Secondary School bad ba lai da ka Jingïaseng Kynthei Mawkyrwat Presbytery.
Ïa ka nam Best Athletes ha ka Under – 14 Boys la ïoh da u Brandmaxson Lyngdoh, jong ka Nativity HSS, under 14- Girls da ka Saphi Parking na ka St Mary’s HSS Mawthong, Under 16- Boys da u Robertson Marwein jong ka Nativity HSS, Under 16 Girls da ka Naksha Thyrniang na ka Rangblang Pres SS, Under 18 boys la ïoh da u Lawanpyndap Kharsyiemlieh na ka Mawranglang Presbyterian Secondary School bad Under 18 girls da ka Lariakor Wanniang na ka skul Balang Mawlangwir Girls SS.
Ha kane ka sngi la ïoh ruh ban sam ïa ki khusnam sha baroh ki nongjop bad ki khusnam shimet.
Ïa kane ka lympung la wan ban pynhap pyrda da u Bah Carness Sohshang , Co- Chairman ka Meghalaya State Development Reforms Commission ha ryngkat ka jingdonlang u Bah D. Syngkon, DSO, SWKHD, Bah I. Lawriniang, BDO Mawkyrwat, Block, Bah M. War, General Manager ka DCIC bad kiwei de ki ophisar kynthup ïa ki nonghikai bad ki khynnah skul.
