Agartala, Jymmang:
U Director General jong ki pulit ka Tripura, u Anurag, u la pynskhem ba ka jingdon ki kam runar baroh ha Tripura, ka la hiar bha ha u snem ba la lah, ha kaba ka jingdon jong ki kam runar, kiba la ïathuh, ka long kaba duna tam ha kine ki 20 snem.
Kumba ka long mynta, la ong ba ha une u snem ba mynta u 2026 ki jingjia jong ki kam runar kim pat da bun naba ka jingpyntreikam jong ki pulit ha kylleng ki jaka ka la ïai bteng, ka jingtehlakam ïa kiba bun ki kam runar ha ka jylla ki dang ïai bteng.
Katkum ka jingkheiñ jong u DGP, ka jingkheiñ ïa ki kam runar baroh ha u snem 2025 ka long 3,698 tylli, kaba pyni ïa ka jinghiar kaba 8.3% haba ïanujor bad 4,033 tylli ki kam runar ha u snem 2024.
“Ki kam runar kiba ïadei bad ki mar ki mata, kiba kynthup ïa ka kam runar bad kam tuh, ki la hiar haduh 16.04%, ha kaba 293 tylli ki mukotduma la pyntip ha u snem 2025 pyrshah ïa 349 tylli ha u snem ba la dep. Ki jingjia jong ka jingshah pynmynsaw bad jingshah thombor, ba la kheiñ kum ka kyndon ba kongsan jong ka aiñ bad ka shongsuk shongsaiñ, ki la hiar da 14.23%, na ka 815 tylli ki jingjia ha u snem 2024 sha ka 699 tylli ki jingjia ha u snem 2025.
Ki jingjia ba ïadei bad ka jingkulmar ruh ki la ïohi ïa ka jinghiar kaba 26%, ha kaba 17 tylli ki jingjia la pyntip mynta u snem pyrshah ïa u snem 2024.
Ki kam runar pyrshah ïa ki kynthei ki la hiar da 8.14%, ha kaba 665 tylli ki kam runar la pyntip ha u snem 2025 haba ïanujor bad 724 tylli ha u snem 2024, u la bynrap.
