Shillong, Jymmang 03
Ka India ka la sdang da ka jingshah rem ha ka lympung ïalehkai AFC U17 Women’s Asian Cup 2026 da 0-2 kol ha ka Australia ha ka Group-B kaba la long ha ka sngi Saitjaiñ ha Suzhou Taihu Football Sports Centre Pitch 8 kaba ha China bad kane ka long ka jingïalehkai hadien 21 snem.
Ha kane ka jingïakhun ki ar ngut ki ‘thei ïalehkai ka Jylla kata ka Bonifilia Shullai bad ka Alisha Lyngdoh ki la ïoh ban mih madan ha ka kylla miet.
Wat hapdeng ka jingïakhun ka la long kaba ïakhaid ha kaba sdang, hynrei ka Australia ka la ïoh ban pynkhih jar nyngkong eh lyngba ka Theodora Mouithys ha ka minit kaba 25. Kane ka kynhun ka la ïoh biang sa shi kol na ka daw ka jingbakla thep hi ka ‘thei ïalehkai ka India ka Abhista Basnett (59’). Haduh kaba kut ka India kam shym la lah ban pynphai bad ka la mad ïa ka jingshah rem.
Te kumta ka India kan pynkhreh sa ka jingïakhun kaba ar pyrshah ïa ka Japan ha ka sngi Ba-ar bad ïa ka Lebanon ha ka 8 tarik.
