Shillong, Jymmang 03
Ka Shillong Sports Association (SSA) ka la lah ban pyndep ïa ka jingkyntiap klob ne ka Inter Club Transfer ha u bnai ba la lah ha kaba ki la don haduh 544 ngut ki rangïalehkai kiba la wan sha ka miej jong ka SSA n aka bynta ban ïasoh sha kiwei pat ki klob kiba thymmai.
Kitei ki 544 ki rangïalehkai ki dei kiba la mih bad pynïasoh sha ki klob kiba don k umba 90 tylli bad kiba hap hapoh ka shatri jong ka SSA. Kane ka dei beit tang na ki klob kiba hap hapoh u pud u sam jong ka SSA bad kim dei kiba la wan ïasoh na kiwei pat ki district ne ki jylla bapher bapher. Lah ban kdew ba ha u snem ba la lah ki la don tang kumba 331 ngut kiba la mih bad pynïasoh sha ki klob thymmai.
Ka Nongrim Hills ka dei ka kynhun kaba bun eh ki rangïalehkai ha kaba ki la don haduh 22 ngut kiba la wan ïasoh thymmai bad kiba la mih ki don 21 ngut. Watla kane ka kynhun ka la hiar kyrdan noh sha ka First Division, hynrei ka la khmih lynti ban wanphai biang sha ka Shillong Premier League.
Ka Pay For Right Academy kaba ïashim bynta ha ka Second Division, ka la pyllait haduh 22 ngut ki rangïalehkai ba kin leit ïasoh noh sha kiwei pat ki klob, hynrei ka la soi thymmai 8 ngut.
Ka kynhun ïalehkai jong ka Shillong Premier League, ka Rangdajied United ka la soi kham bun ki rangïalehkai kata haduh 19 ngut. Kumjuh ka Nongkrem kaba shim bynta ha ka First Division ka la soi 19 ki rangïalehkai, nangta ka kynhun ïalehkai First Division ka Nongthymmai (17 ngut). Katba Umphyrnai kaba la hiar sha ka Third Division ki la 16 ngut ki rangïalehkai) bad ka Umlyngka kaba la kiew sha ka Second Division ka la soi 15 ngut.
Ka Malki, kaba la shah pynhiar kyrdan sha ka First Division, ka la pyllait noh haduh 15 ngut ki rangïalehkai bad ka la pynrung thymmai 13 ngut. Ka Mawkasiang kaba la don ha ka Third Division, ka la pyllait noh haduh 16 ngut ki rangïalehkai bad ka la soi 13 ngut.
Hapdeng ka jingthnem bha kane ka ïew ïathied rangïalehkai, hynrei ki don pat ki klob ki bym kwah ban soi thymmai bad ki la pyllait noh ïa bun bah ki rangïalehkai ba kin leit ïasoh noh sha kiwei pat ki klob. Kine ki long ki klob Fourth Division kata ka Laitumkhrah kaba la pyllait noh haduh 13 ngut ki rangïalehkai bad ka Mawlyngngad kaba la pyllait noh 11 ngut.
