Mairang, Jymmang 03
Ka Little Star English Secondary School sa shisien ka la rah biang ïa ka nam lahduh ha ka 5th EWKH District Level Inter School Athletics Meet 2026 ba la pynlong da ka shlem treikam jong ka District Sports Officer (DSO), West Khasi Hills District ha ryngkat ka jingïatreilang bad ka District Sports Association Mairang.
Ïa kane ka lympung ïalehkai kaba lai sngi kynthih, la pynlong hapoh madan Khadsawphra College Mairang ïa kaba la pynhap pyrda noh ha ka 1 tarik mynta u bnai, ha kaba la sakhi ïa ka jingïashim bynta shitrhem jong ki khynnah skul kynthei bad shynrang kiba kot haduh 800 ngut na ki 26 tylli ki skul jong ka Eastern West Khasi Hills.
Ïa kane ka lymnpung la wan pynhap pyrda da u Working President ka Meghalaya State Olympic Association (MSOA), Bah John F Kharshiing kum u kongsan, ha ryngkat ka jingïadonlang ka DSO WKH ka kong Balarina Syiem, u Sordar ka shnong Pyndengumïong u Bah Bornad Syiemïong, ki Principal na ki skul bapher bapher, ki nonghikai, ha ryngkat ki khynnah skul.
U Bah Kharshiing haba kren ha kane ka sngi u la ong, “Ngim dei pyndon burom tang ïa kiba jop, hynrei ban ïakmen lang wat ïa kito ki bym shym la jop ruh kiba don ïa ka mynsiem ban ïashim bynta. Ka jingïashim bynta ki khynnah skul U-14, U-16 bad U-18 ki long kiba donkam bha ha ka liang ki kam ïalehkai, naamr donkam ban jied ïa ki khynnah kba don ïa ki sap ba kyrpang.”
U la ong ba kane ka jingïashim bynta ha ka district level ka dei ka jingsdang jong ki da kaba kyntu ruh ba kin dangïai trei shitom bad minot ha ka jingkilanmet, khnang ba ka Jylla kan lah ban sei ïa ki ha ki lympung ïalekai National, International bad haduh ka Olympic.
Ha katei ka sngi la ïoh ruh ban sam ïa ki khusnam sha ki rang bad ki ‘thei ïalehkai kiba kynsai da ki syrnot ha ryngkat ki trophy ha kaba ka lahduh ka Little Star ka la khur bun ki trophy, katba ïa ka nam Best Discipline Team la ïoh da ka Langtor HSS bad ïa ka nam Best March Pass la rah da ka Pyndengumïong Presbyterian HSS.
