Imphal, Jymmang:
Ki bor pahara ki la ïai bteng ïa ki jingkhynra ha kylleng ki jaka kiba hapoh ka jylla Manipur kum shi bynta ban khanglad ïa ki jingjia ïakynad bad ki jingjia basngewsih kumba la sakhi.
Kiba kum kine ki jingleit khynra ki la long ki lad ban khanglad ïa ki kam thombor na ka jingïoh ban kurup ïa ki tiar siat, na kylleng ki jaka.
Ki bor pahara ki la ïoh ban kurup ïa ki tiar siat kiba bun bha na ki jaka bapher bapher ha ki distrik Churachandpur bad Bishnupur jong ka Manipur, kaba pynpaw ïa ki jingpyntreikamk kiba dang ïaid shakhmat ban khanglad ïa ka jingsaphriang jong ki tiar siat beaiñ ha kane ka thaiñ.
Katkum ki tyllong khubor ba thikna, da kaba treikam katkum ki jingtip ba kyrpang jong ki bor pahara, ki bor pahara ki la pynlong ïa ka jingkhynra ha ka thaiñ Nepali Basti hynnin ka sngi kaba hap hapoh jong ka Churachandpur Police Station, ha kaba ki la ïoh ban kurup ïa ki tiar ïaleh bapher bapher kiba la shna hi ha la ka jong ka ri bad kiba long kum ki tiar ïaleh shipai.
Ki mar ba la ïoh ki kynthup ïa ar tylli ki suloi ba la shna da ka ri, kawei ka suloi shna hi ka (pompi), ar tylli ki bom Grenade ba la shna hi, lai tylli ki Shell ba la shna hi, 8 tylli ki bom Mortar, 15 tylli ki suloi AK-47 kiba thylli, arphew san tylli ki kuli bym pat pyndonkam ba 7.62mm, bad ar tylli ki Wood-piercing Shell.
Ha ka jingkhynra ba kyrpang hapoh jong ka Moirang Police Station ha Bishnupur distrik, ki bor pahara ki la ïoh ban kurup biang sa kawei ka set jong ki tiar ïaleh bad ki tiar pyntreikam da ki buit na ki bynta jong ka surok Keipha.
Ki tiar ba la ïoh ban kurup ki kynthup ïa ka suloi Sniper .303 kaba don Magazine, kawei ka Telescope, kawei ka suloi Sten Gun ba la shna ha ka ri, ar tylli ki suloi ba don tang kawei ka ktang, kawei ka suloi .32 kaba la shna ha ka ri kaba don Magazine, ar tylli ki pla BP, san tylli ki BP plate bad kawei ka Rubber tube.
La pynlong ruh ïa ka jingkhynra ha Phubala Mamang Pat, kaba don ruh hapoh Moirang Police Station, ha kaba ki shipai ki la ïoh ban kurup kawei ka suloi INSAS Light Machine Gun (LMG) kaba don ïa u Magazine, kawei ka suloi SBBL, uwei u bom kawang kti ka China, san tylli ki kuli INSAS 5.56mm bym pat pyndonkam, san tylli ki kuli Ballistic, 6 tylli ki kuli 12 bore, lai tylli ki .303 Round Charger, kawei ka Tube launching Cylinder, kawei ka Baofeng handheld Radio Set, lai tylli ki Bulletproof helmets, saw tylli ki BP plate bad kawei ka Rubber tube.
Ki bor pynïaid ki la sdang ïa ka jingtohkit ban lap ïa ka tynrai bad ka jingthmu ban pyndonkam ïa ki tiar ïaleh ba la kurup. La ngeit ba kine ki jinglap ki dei shi bynta jong ki kam pahara kiba dang ïaid shakhmat kiba thmu ban pynduhjait ïa ka jingdon jong ki tiar beaiñ ha ki jaka ba shah ktah ha ki kam thombor ha Manipur.
