Imphal, Jymmang:
Da ka jingtrei shitom la lap ïa ka jaka buh tiar ïaleh bad ki tiar pynbthei kiba bun na ka jingkhynra lang jong ki shipai Assam Rifles ka Indian Army bad ki pulit jong ka Pherzawl ha Manipur ha ka 1 tarik, Jymmang, shisngi shwa ka jingrakhe ïa ka jingïaleh hapdeng ki jaitbynriew ha kane ka jylla.
Kum ka jingpyntreikam kaba khlaiñ hadien ba la ïoh ïa ki jingtip ba tikna jong ki bor pahara, la sdang ïa ka jingkhynra ha ka jaka hapdeng ka shnong Ngampanung bad Phulpui, kaba la pynlong ïa ki ban kurup ïa ki tiar ïaleh kiba bun bad ki jaka ba la buh ïa kum kine ki tiar hiar thma.
Ki tiar kiba la ïoh ban kurup ki kynthup ïa 7 tylli ki suloi shna hi, kawei ka pistol, kawei ka suloi .303 bad u kuli, ar tylli ki Pompi Launcher, 32 tylli ki bom Pompi, kawei ka Motorola Communication Set ha ryngkat u Charger, bad 51 song ki Mortar. Ha kaba ïadei bad kane ka jingkhynra, ym shym la don mano mano ruh ban shah kem.
Ki heh sorkar ki la ong ba kane ka jingpyntreikam ka la long naba ka jylla Manipur ka rakhe ïa ka jingdap lyngkhuh snem jong ka jingjia ka jingïakynad jaitbynriew, kata ha ka 3 tarik, Jymmang, ha kaba ki bor pahara ki pynneh ïa ka jingpahara kaba jur ban khanglad ïa kano kano ka jingpyrshang ban pynthut ïa ka jingsuk bad ka shongsuk shongsaiñ paidbah.
Katkum ka jingong jong ka Assam Rifles, ki tiar ïaleh bad ki tiar pynbthei ba la ïoh kurup ki lah ban long kiba lah ban pyndonkam ban pynmih ïa ka jingkulmar ha shilynter ka surok bah National Highway-37 bad ki jaka ba marjan. Ïa kine ki tiar kiba la ïoh kurup la aiti noh sha ki pulit ka Pherzawl ban pynlong ïa ka jingtohkit kaba bniah.
