Agartala, Jymmang:
Ka jinghap slap kaba jur, kaba dang ïai bteng ka la wanrah ïa ka jingjulor kaba khraw ïa ki jingthung jingtep bad ktah ïa ka rep ka riang ha kylleng ka Tripura, kaba la ktah ïa palat 21,000 metric ton ki mar rep, ha kaba ka jingduhnong baroh la antad ba kan long T.59.17 klur, ong u Myntri ka tnad rep ka jylla u Ratan Lal Nath ha ka 2 tarik, Jymmang.
U myntri u la ong ba ka jylla ka ïoh ïa ka jinghap slap kaba 133.9 mm hapdeng ka 27 bad 29 tarik u Ïaïong, kaba la wanrah ïa ka jinglang um, ka jingshlei um bad ka jingtwa khyndew khamtam ha ki jaka them. Ka jinghap slap kaba bun tam ka long ha Kamalpur kaba 283 mm, bud sa ka Bishramganj kaba 278 mm bad ha Khowai kaba 230 mm.
Katkum ka jingkheiñ kaba nyngkong, kumba 6,105 hektar na ka jingthung jingtep baroh kaba 58,540 hektar ki la shah ktah. Ka jingduhnong ha ka jingpynmih kaba la antad ka long haduh 21,635 metric ton, kaba ktah ïa 32,895 ngut ki nongrep ha kylleng ka jylla.
Ka South Tripura ka la paw kum ka distrik kaba la shah ktah jur bha ha kaba ka jingduhnong ha ka jingpynmih mar ka long 10,470 metric tons, katba ka Khowai ka la duna tam ha ka jingduhnong kaba long 463 metric tons.
Haba batai ïa ki nongrep kum u budlum ha ka imlang sahlang, u Nath u la pynthikna ba ka sorkar kan ai ïa ki jingïarap baroh na ka bynta ban ïoh biang ïa ka jingpynbha bad kyrshan ïa ki. U la ong ba la pyntreikam ïa ka rukom treikam ba bun kyrdan jong ka jingshah pynjulor ha ka tnad rep, ha kaba la thung ïa ki ophisar nodal ha ka kyrdan jong ka jylla, distrik bad sub-division ban peit bad pynbiang ïa ki lad ai jingïarap bad pynbha.
La pyntreikam ruh ïa ki kynhun ba kloi ban ïarap, katba ki nongtrei ha ki lyngkha ki dang long kiba peitngor na ka bynta ban bishar bniah ïa ka jingduhnong jong ki jingthung da kaba pyndonkam ïa ka teknoloji geo-tagging. Ki bor pynïaid ki dang trei ha kajuh ka por ban pynbha ïa ka jingtuid um ha ki jaka rep kba bad jhur khnang ban ïada na ka jingshah pynjulor shuh shuh.
Ka tnad ka la ai jingmut ïa ki nongrep ban shim ïa kiwei pat ki rukom rep katkum ka jinglong ka khyndew, kynthup ïa ki shyieng symbai, ki shyieng pynmih umphniang, ki riewhadem bad u krai ha ki thaiñ ba ïahap bad ka jinglong ka mariang.
U Myntri u la ong ba ka sorkar ka ïeng skhem bad ki nongrep ha ka por ba don ka jingeh bad u la ban jur ba ka jinglah ban ïeng ha ka rep ka dang long kaba kongsan bha na ka bynta ka ïoh ka kot bad ka roi ka par jong ka Tripura.
