Guwahati, Jymmang:
Ka jinglap markhmat halor ka kam beaiñ, ka la pynlong ïa u heh ka tnat ba dei khmih ïa ki khlaw ba un shahkem ha North Lakhimpur kaba don ha Assam katba u dang kner ban shim pisa kum ka jingbam tyngka kaba la paw pyrthei ha ka rukom treikam jong ka Lakhimpur Forest Division.
U Shivasish Sandilya, u Forest Range Officer jong ka North Lakhimpur, u la shahkem ha ka 2 tarik, Jymmang, ha ka por ba u dang pdiang ïa ka pisa kaba T.12,000 na uwei u trai kali uba donkti ban shalan ïa u shyiap bad kiwei pat ki marpoh khyndew.
Uwei u briew uba la ngat ha ka jingshah dawa pisa u la mih shakhmat da kaba kynnoh ïa ka jingbamsap kaba la slem bha ha ka tnad khlaw jong ka Lakhimpur.
U Indrajit Morang, ïa uba la tip ruh da ka kyrteng kum u Michael, uba dei u nongbat ïa ka jingai jingbit ban tih marpoh khyndew, u la kynnoh ïa ka tnad khlaw jong ka distrik ba la jyllei bha ka bamsap bad ka jingleh bymsuidñiew.
Katkum ka jingong u Michael, watla u don ïa ki kot ki sla kiba biang na ka bynta ban tih shyiap bad kiwei kiwei ki marpoh khyndew kiba rit, hynrei u la shah pynbor ban siew ïa ka pisa ba la dawa sha ki nongtrei khlaw kiba don ki kyrdan bapher bapher ha ka distrik Lakhimpur ha kine ki arphew san snem ba la leit.
“Nga la siew kumba 5 klur tyngka ha kine ki arphew san snem sha ki heh jong ka khlaw ha Lakhimpur ban bteng ïa ka kam jong nga”, la ong u Michael.
Haba pynkynmaw ïa ka jingïapynibor kaba nyngkong jong u bad ka jingkynnoh bamsap ha ka tnad khlaw, u Michael u la ong ba ha kaba sdang la buh ïa u na ka bynta ban buh ïa ki dieng kiba la pyntuid ha ka wah Ranganadi na ki lum kiba sharum.
“U DFO jong ka Lakhimpur ha kata ka por, u B.D Gogoi, u la kurup ïa ki dieng kiba nga la lum na ka wah Ranganadi ha kaba kut jong u bnai Nailar, 1999 bad u la byrngem ban phah phatok ïa nga,” la pynkynmaw biang u Michael. U la ong ba hadien la ai jingmut ïa u da u DFO ban khaïi ïa u shyiap bad kiwei kiwei ki marpoh khyndew kiba rit kiba la sei na ki maw wah, bad u la don ha kane ka kam naduh katei ka por.
Hynrei u la kynnoh ba ha kane ka por baroh kawei, ka kam jong u ka la shah pyndik man ka por ha ki heh ka tnad khlaw.
Haba batai bniah ïa kaei kaba u la batai kum ka rukom treikam kaba bamsap, u Michael u la ong ba baroh ki kyrdan jong ki heh khlaw la kynnoh ba ki sei pisa na ki nongbat ïa ka jingbit ban tih marpoh khyndew, kaba pynlong ïa ki ban ïoh ïa ka jingmih kaba duna bha. U la bynrap ba tang kito kiba ju siew ïa ka pisa ba la shah dawa ki lah ban im ha ka kam khaïi.
“Ki heh jong ka khlaw Lakhimpur ki khanglad wat ïa ki nongshong shnong ban tih shyiap hapoh la ka jong ka jaka, katba ki dang sah khlem pyrkhat ïa ka jingpom dieng kaba la jyllei bad ka jingkhaïi dieng beaiñ ha ki jaka khlaw,” ong u Michael.
U la kyrpad ïa ka sorkar jylla ban pynïakhlad noh ïa ka tnad tih shyiap na ka tnad khlaw ban pynkut noh ïa kaei kaba u la batai kum ka rukom bamsap bad ban pynbha ïa ka khajna jong ka jylla.
U la pynpaw ruh ïa ka jingsngewkhia halor ka jingkynnoh ba ka tnad khlaw ka la leh khlem akor ban ïada ïa ki dieng ki siej bad ki mrad ki mreng, da kaba kdew ïa ka jingpom pathar ïa ki khlaw ha Lakhimpur ha kine ki arphew snem ba la leit.
