Guwahati, Jymmang:
Ha ka jingkhynra kaba jur halor ka jingkhaïi drok ha ka thaiñ Shatei-Mihngi jong ka ri India, ki shipai ka tnat Assam Rifles, ha ka jingkhynra lang bad ka ARFIU bad ki pulit jong ka Cachar, ki la ïoh kurup ïa ki 10,000 tylli ki dawai Yaba kiba shongdor kumba 1 klur tyngka ha Cachar distrik jong ka Assam.
Ïa kane ka jingkhynra la pynlong hajan Jirighat ha ka 2 tarik u Jymmang hadien ki jingtip ba kyrpang jong ki bor wad bniah ha kaba ïadei bad ka jingleit jingwan jong ki drok beaiñ ha kane ka thaiñ. Ha kane ka jingkhynra, ki bor pahara ki la khanglad ïa katei ka mar bad ki la kem ïa arngut ki briew, baroh arngut ki dei ki nongshong shnong jong ka Cachar distrik.
Ki heh sorkar ki la kurup ruh ar tylli ki mobile phone na kine kiba la shah kynnoh ha ka por ba pynlong ïa ka jingkhynra. Ïa ki briew kiba la shah kem ryngkat bad ki mar khaïi kiba la iïh kurup la aiti noh sha ki pulit ka Cachar ban leh ïa kaba donkam.
Ka Assam Rifles ka la pynpaw ba kane ka kynhun ka dang bteng ban don ka bynta kaba kongsan ha kaba ïakhun pyrshah ïa ka jingkhaïi drok ha ka thaiñ Shatei-Mihngi lyngba ki jingtreikam ba ïatreilang bad ki bor pynjari aiñ bapher bapher. Ki bor synshar ki la pynpaw biang ïa ka jingkular jong ki ban pynduh pyndam ïa ki jaka khaïi drok bad ban ïada ïa ki samla na ki jingma jong ka jingdih drok.
