Mawkyrwat, Jymmang 05
Ka SP Office ka la long ka lahduh ha ka Inter Office T20 Cricket Tournament 2026 ba la pynïaid da ka South West Khasi Hills District Cricket Association, hadien ba ka la pynliem noh ïa ka Ophis u BDO Mawkyrwat Block ‘A’ da 6 wiket.
Ha kane ka jingïaleh-kai final kaba la long ha ka sngi Ba-ar ha madan Mawpyllun kaba ha Maw-ten, ka Mawkyrwat Block ka la kam trai ban tied nyngkong ha kaba ka la kamai tang 95 run bad shah pynkhyllem baroh ki nongtied.
Haba wan shimti ïa ka pali kaba ar, ka SP Office ka la lah ban kynjoh sha ka thong. Ïa ka nam Man of the Match la khur da u Lestrilian Momin, uba lah ban ïalehkai bha kata na ki 4 over u la lah ban tied 22 run bad khur ruh 3 wiket.
Ïa ka nam Highest Run Scorer la ïoh da u Dapbiang Marweiñ jong ka Ranikor C& RD Block uba la lah ban kamai haduh 233 run, Highest Wicket Taker la ïoh da u Stevenson Syiem jong ka SP-A uba la khur 14 wiket. Katba ka nam Best Fielder ka leit sha u Deibanshabbor Mylliem bad ïa ka nam Man of the Tournament la ïoh da u Dapbiang Marweiñ.
Kum ban shu kdew ha kane ka lympung ki don haduh kumba 26 tyllii ki kynhun kiba la wan ïashim bynta. Ïa kane ka lympung la wan ban pynhap pyrda da u James Sangma, President ka Meghalaya Cricket Association ha ryngkat ka jingdonlang ki nongkitkam ki dkhot ka synjuk bad kiwei kiwei.
