Itanagar, Jymmang:
Ka Arunachal Pradesh ka la sakhi ba ki la don bun tylli ki kynhun kiba la bteng ïa ki kam jong ki ha ka ban pynneh pynsah ïa ki khlaw ki btap bad ïa ka jingjyrngam jong ka mariang.
Ka long kawei na ki jylla kaba la kham paw ha ka ri kaba don ïa ki khlaw ba rben bad kiba heh tam, katkum ka India State of Forest Report (ISFR) 2023.
Da ka jingheh jong ka khlaw kaba don da 65,882 square kilometer, ka jylla ka don ha ka kyrdan kaba ar, hadien ka jylla Madhya Pradesh, kaba wan hakhliehduh da ka jingheh kaba don 77,073 kilomitar.
Ka jingdap da ki khlaw kaba itynnad jong ka jylla, kaba don palat 75% na ka jingheh jong ka khyndew baroh kawei, ka pynpaw ïa ka bynta kaba kongsan jong ka ha ka jingsumar ïa ka mariang.
U Myntri Rangbah ka Arunachal Pradesh u Pema Khandu, u la ïaroh ïa ka jingpyrshang jong ka tnad ba dei khmih ïa ki khlaw bad ki nongshim bynta bapher bapher ban ïada bad pynroi ïa ki marpoh khyndew jong ka jylla.
Ha ka jingpynbna lyngba ka Social Media, u Myntri Rangbah ka jylla u la ban jur ïa ka bynta ba kongsan jong ki khlaw ban pynduna ïa ka jingkylla ka suiñbneng da kaba kjit ïa ka lyer kaba jaboh ne ka Carbon Dioxide bad pyllait ïa ka lyer kaba khuid ne ka Oxygen.
Ka jingdon jong ki khlaw kiba rben ka ai jingkyrmen ïa ka jingneh ka mariang bad ka jinglah ban wanrah ïa ka jingkhuid jong ka lyer bad ban lah ban pynbiang ïa ka jinglong ka suiñbneng khamtam ha ki por shit bad ban lait na ki jingpang ba bun jait.
Ha kaba ïadei bad kane u la kyntu ïa ki paid nongshong shnong jong ka Arunachal Pradesh ba kin ïai bteng ha ka ban kyrshan halor ka jingpynneh pynsah ïa ka roi ka par bad ka jingsumar bad pynneh ïa ka mariang.
U Myntri Rangbah u la pynpaw ruh ïa ki jingmyntoi kiba bun jong ka jingsumar ïa ki khlaw, kynthup ïa ka jingïada na ka jingtwa khyndew, ka jingpynbeit ïa ka jingkylla jong ka um, ka jingpynbha ïa ki jingthaw ba im, bad ka jingpynbiang ïa ki marpoh khyndew kiba donkam kum ki dieng, ki soh, bad ki kynbat ba bun jaiat kiba long dawai.
