Shillong, Jymmang 05
Ka St. Nanak SS bad ka KV Happy Valley ki la jam sha ka final ha ka lympung ïalehkai Inter School Under-18 Cricket Tournament 2026 ba la pynïaid da ka Shillong Cricket Association (SCA) bad kin pynkhreh ban ïaknieh ïa ka nam lahduh.
Ha ka jingïakhun semi final kaba la long ha ka sngi Ba-ar ha madan Polo, ka St. Nanak ka la pynliem noh ïa ka Sunrise Academy da 57 run. Ka St. Nanak kaba la kam trai ban tied nyngkong ka la kamai 154 run bad shah pynhap 3 wiket ha ki 16 over. U Ayush Kumar u la long u nongtied uba kynsai ha kaba u la ïoh ban khyrwit ïa ka shiteng spah kaba 70 run na ki 48 bol bad u Piyush Kumar Ray u la ïoh 44 run na ki 32 bol. Katba u Obojit Paul u la khur 2 wiket.
Haba wan beh ïa ka thong ka Sunrise Academy ka la kamai tang 97 run bad shah pynhap 7 wiket ha ki 16 over. U Harsh u la tied 19 run na ki 21 bol bad u Ayan Burman u la ïoh 18 run na ki 13 bol. Katba u Ashish Kumar u la khur 2 wiket. Ïa ka nam Player of the Match la khur da u Ayush Kumar, uba la tied 70 run bad shim 1 wiket.
Haba phai sha kawei pat ka jingïakhun kaba ar, ka KV Happy Valley ka la jop da 9 wiket ïa ka St. Anthony’s HSS. Ka St. Anthony’s kaba la shimti ban tied nyngkong, ka la kamai 105 run bad shah pynhap 8 wwiket ha ki 20 over. U Ayush Debnath u la tied 20 run na ki 16 bol bad u Samelawan u la ïoh 14 run na ki 14 bol. Katba u Aman Chahal ula khur 2 wiket.
Haba wan shimti ïa ka pali kaba ar, ka KV Happy Valley ka la kynjoh sha ka thong da kaba kamai 108 run bad shah pynhap 1 wiket ha ki 20 over. U Aman KR Ray u la tied 44 run na ki 46 bol bad u Udit Pradhan u la ïoh 39 run na ki 52 bol bad ban khur ïa ka nam Player of the Match.
