Shillong, Jymmang 05
Ka Meghalaya Basketball Asso-ciation ka la wer ïa ki khynnah ïalehkai basketball sha ka jingpyrshang ne ka trial na ka bynta ka Northeast Elite Basketball League ka ban sa long shen ha Mizoram.
Kane ka jingjied ka long na ka bynta ki nongïalehkai shynrang kiba hapoh 19 snem rta bad ki dei ruh ban long kiba la kha ha lane hadien ka 1 tarik u Kyllalyngkot 2007. Ïa kane ka jingjied yn pynlong ha ka 8 tarik mynta u bnai Jymmang 2026 ha ka por 3 baje nohphai sngi ha Raid Laban College bad kumjuh ha ka 9 tarik u Jymmang 2026 ha ka por 7 baje mynstep ha Raid Laban College.
Kat kum ka kyrwoh ba la pyllait da u Secretary ka Selection Committee jong ka MBA u Bah Symper Ryntathiang, la ong ba ki khynnah kiba kwah ban wan ïashim bynta ki dei ban wanrah ïa ki kot ki sla ki ban pynshisha ïa ka snam kha (Original & Xerox Birth Certificate), ka Adhaar Card, ka ‘Residential Certificate’ na ka bynta ki bym dei ki Khasi kaba ym duna ïa ka 15 snem bad ki dei ban wan hashwa ïa ka por. Ïa ki jingtip ba bniah ki lah ban phone ha u 9485435263 lane 6009461141.
