Shillong, Jymmang 06
Ka Amlarem SC ka la pynliem noh ïa ka Mawlai SC, kaba la bat teng ïa ka nam lahduh, da 2-1 kol ha ka jingïakhun jong ka Group-C jong ka 5th Meghalaya State League, hynrei kane ka jingshah rem kam don jingktah eiei namar ka la dep pyntikna lypa ban rung sha ka pre-quarter final.
U nam tam ha kane ka jingïakhun dei u Wantiw-june Buam uba la lah ban lamkhmat ïa ka Amlarem ban thep ïa ki artylli ki kol ha ka 1 minit bad kaba 76, katba ïa ka shi kol jong ka Mawlai la thep da u Batskhemlang Thongnirit ha ka minit kaba 15.
Kumta da kane ka jingjop, ka Amlarem SC ka la kiew sha ka kyrdan ba-ar hadien ba ka la ïoh ba kan khur 10 poiñ, katba ka Mawlai ka dangbat ïa ka kyrdan ba hakhlieh da kaba kamai 13 poiñ.
Ha ka jingïakhun ha Mawkyrwat, ka lahduh jong u snem 2023 ka Rangdajied United FC ka la mad ïa ka jingshah rem kaba ar sa ha ka Mawten SC da 1-0 kol. Ïa kane ka shi kol la thep da u Lastbornson Marweiñ ha ka minit ba 12 ha ka jingïakhun ka Group-H.
Ha kaba kut, na kane ka Group don lai tylli ki kynhun kiba ïoh ban khur mar 8 poiñ kata ka Rangdajied, Mawten bad ka Seng Samla Umdang Pyllun, ha kaba ïa ka rai jong kine baroh kan shong pat ha ka Tournament Committee ka MFA.
Haba phai pat sha ka jingïakhun ka Group-A ba la long ha SSA Stadium, Polo, ka Khimusniang SC ka la ïakhaid da mar 1-1 kol bad ka Nongkseh SSCC.
Ïa ka shi kol ka Nongkseh la thep ha ka minit ba 56 lyngba u Shano Tariang, hynrei ka Khimusniang ka la pynphai kylla lyngba u Dawanbiangmi Passah (75′), ha kaba ka kol kaba u la ioh ba un thep kam lah ban khlem da ïoh ïa ka jingïaroh bad pyrto bha na u paid ba la poi ban sakhi ïa kane ka jingïakhun.
Ha ka jingïakhun kaba la long ha Mairang, ka Langsning FC ka la jop da 5-0 kol ïa ka Mishon SSCC, ha kaba u Samuel Phawa (26′, 42′), bad u Nelson Rymbai (57′, 90′) ki la lah ban lamkhmat ïa ka kynhun ban ïoh thep mar ar kol bad ïa ka shi kol la thep da u Kyrmen -skhem Mukhim (32′).
Da kane ka jingjop, ka Langsning FC kan pyntikna ïalade ba kan bat ïa ka kyrdan ba nyngkong na kane ka group, katba ka Mishon ka dangsah sa kawei ka jingïakhun ka ban long ha ka 8 tarik mynta u bnai pyrshah ïa ka Lawbah SC, kaba na kane ka jingïakhun yn sa ïoh ïa ka rai mano ban jam lang shakhmat bad ka Langsning FC sha ka pre-quarter final.
Ha ka jingïakhun ha ka Group-G ba la long ha Williamnagar, ka Maram FC ka la pynliem da 6-1 kol ïa ka Attong Matgrik FC. U Salchang Ch Sang-ma (36′, 37′, 61′) u la khur ïa ka hat-trick.
Ha ka jingïakhun ha Khliehriat kaba dei na ka bynta ka Group-D, ka Rymbai Shkenshynriah ka la lah ban pynliem da 5-2 kol ïa ka Jalaphet Moo-chut Pyrdung SC.
Ha ka Group-B pat ka Nangkiew Irat SC ka la pynliem noh ïa ka Mulang SC Nongbah da 6-2 kol ha madan MFA, Third Ground, Polo. U Wallamsuk Nongkhlaw (2′, 19′, 24′, 80′) u la thep marwei haduh saw kol.
Ha ka sngi Palei kin don artylli ki jingïakhun kawei na ka bynta ka Group-E ha Wahïajer ha kaba ka Lamyrsiang SCC kan ïakhun pyrshah ïa ka Ïatyllilang Lumsehkot CSC, katba ha ka Group-G ha Williamnagar ka A’chik SCO Rongjeng kan ïakynduh pyrshah ïa ka Balmanduri FC. Kine ki jingïakhun kin long ha ka por 3 baje nohphai sngi.
