Shillong, Jymmang 07
Ka Mawnianglah Youth SC ka la khur ïa ka jingjop ha kaba sdang ïa ka U-20 Fourth Division Football League 2026 ba la pynïaid da ka Shillong Sports Association (SSA), hadien ba ka la pynliem noh ïa ka Seila Sap F&CC da 2-1 kol ha ka sngi Palei.
Ha kane ka jingïakhun kaba la long ha SSA Stadium, Polo baroh ar tylli ki kynhun ki la pyrshang ban ïakhun tyngeh naduh kaba sdang. Ka Sei La Sap ka la ïoh ban pynkhih jar nyngkong eh lyngba u Mebanïohnam Lyngdoh ha ka minit kaba 25 na ka bynta ban tam shi kol ha ka kylla step.
Hynrei ka Mawnianglah ka la wanphai da ka jingkhlaiñ bor ha ka kylla miet ha kaba ka la lah ban pynphai kylla ar kol lyngba u Riborlang Kharkongor ha ka minit kaba 70 & 74 na ka bynta ban khur syndon ïa ka jingjop.
Ka jingïalehkai ha ka sngi Thohdieng kan long hapdeng ka Summit Academy pyrshah ïa ka Laitkroh SC ha ka por 1 baje nohphai sngi ha SSA Stadium, katba ka Imson SC ïa ka Lumkseh SC ha ka por 1 baje mynsngi ha madan MFA bad ka Diengpasoh SC ïa ka Umïew S&CO ha ka por 4 baje ha SSA Stadium.
