Shillong, Jymmang 07
Ka lahduh jong ka aïom ba la lah, ka Paris Saint-Germain ka la ïoh jaka ban jam sha ka final ha ka
UEFA Champions League, hadien ba ka la ïakhaid mar 1-1 kol pyrshah ïa ka FC Bayern Munich ha ka semi final ka wat kaba ar bad ban tam da 6-5 ha ka ‘aggregate’ ha Bavaria.
Da ka jinglah ban ïalehkai bha ha ka wat kaba nyngkong, ka PSG ka la pyrshah ban ïakhun tyngeh naduh kaba sdang, ha kaba ka la ïoh ban pynkhih jar tang ha ka minit kaba 3 lyngba u Ousmane Dembele.
Ka kol kaba nyngkong ka la pynkyndit bynriew ïa ka Bayern Munich namar kam shym la poi pyrkhat ba kan shah thep tang mar ïasdang ka jingïalehkai. Te kumta kane ka kynhun u Vincent Kompany ka la pyrshang ban ïakhun tyng-eh na ka bynta ban pynphai ha kaba u Luis Díaz bad u Michael Olise ki la ïoh ïa ki kabu kiba biang, hynrei kim shym la lah ban pynurlong.
Hynrei hashwa ban wai ka Bayern ka la lah ban pynphai kylla lyngba u Harry Kane (90+4) na ka bynta ban ïakhaid mar shi kol.
Lyngba kane ka jingjop ka PSG kan pynkhreh ban ïaknieh ïa ka nam lahduh pyrshah ïa ka Arsenal ha ka final ha ka ban long ha ka 30 tarik mynta u bnai.
Ka Arsenal ka la rung sha ka final hadien ba ka la pynliem noh ïa ka Atletico Madrid da 1-0 kol ha ka semi final kaba ar na ka bynta ban tam da 2-1 ha ka ‘aggregate’.
