Nongstoiñ, Jymmang 08
Ka kynhun ïalehkai jong ka Animal Husbandry & Veterinary office kala ïoh ban khur bad rah ïa ka nam lahduh ha ka lympung ïalehkai cricket ïa kaba la tip kum ka 2nd West Khasi Hills Inter Office Institutional T20 Cricket Tournament 2026 ïa kaba la pynlong da ka West Khasi Hills District Cricket Association.
Katei ka jingïoh ban khur jong ka Animal Husbandry & Veterinary Office ïa katei ka nam lahduh kadei hadien ba kala ïoh ban khur ïa ka jingjop da kaba pynliem noh ïa ka kynhun ïalehkai jong ka PHE Office ha ka jingïalehkai final pyrshah kaba la long ha ka Sngi Thohdieng jong ka taïew ha madan Synod College.
Haba phai sha katei ka sngi final hapdeng ka PHE Office bad ka Animal Husbandry & Veterinary Office, ïa ka jingkynting pisa (toss) la jop da ka PHE Office ha kaba kala jied ban kawang bol shuwa .
Shuh-shuh haba rem ïa ka toss bad shim ïa ka bynta ban tied nyngkong ka Animal Husbandry & Veterinary Office ka la lah ban Kamai 133 ron bad hap noh 10 wiket na ki 18.4 over.
Nangta, haba beh ïa ka thong ka long kaba itynnad shisha bad kaba pynihun ïa ki paidbah ba wan peit kai ha kaba ka PHE ka lah ïoh ban poi 131 ron bad hap noh 8 Wiket na ki 20 over. Kumta ka Animal Husbandry & Veterinary Office kala jop da 2 ron, katba u Kevin Kynshikhar uba la ïoh 63 ron na ki 41 bol, 4 over 11 ron 3 wiket u la ïoh ban khur ïa ka nam ‘Player of the match’.
Shuh-shuh ha kane ka sngi ka nam ‘Highest Run Scorer’ la ïoh ban khur da u Iohbynta Sanglyne na ka PHE office,
‘Highest Wicket Taker’ la ïoh ban khur da u Bankitboklang Lyngdoh na ka PHE, nangta ïa ka nam ‘Player of the Tournament’ la ïoh ban khur da u Mickey Marngar na ka DC Office.
Ha kane ka sngi la pynhap pyrda ïa kane ka lympung ïalehkai da u Dr. R.M Lyngdoh, Principal Synod College Nongstoiñ uba la long kum ka kongsan ha ka jingïadon lang u Bah Moonshine Dkhar Sordar ka Shnong Tiehsaw, ha ka jingdonlang ruh kiwei-kiwei ki riew rangbah bad ki nongkitkam jong ka Association kiba la sam ruh ïa ki khusnam.
