Guwahati, Jymmang:
U Chief Secretary jong ka Assam u Ravi Kota ha ka 6 tarik u Jymmang u la bishar bniah ïa ki jingpynkhreh na ka bynta ka jingpynsmai ïa ka sorkar NDA ba dang shu jied thymmai ha kane ka jylla, kaba la buh ban long ha ka 12 tarik u Jymmang.
Ka jingshim smai jong ka sorkar NDA kaba ïalam da ka seng Bharatiya Janata Party kan long ha Veterinary Field kaba don ha Khanapara kaba don ha marjan jong ka nongbah Guwahati.
La khmih lynti ba u Myntri Rangbahduh ka ri, u Narendra Modi, katto katne ngut ki Myntri ka sorkar pdeng, ki Myntri Rangbah bad ki Symbud Myntri Rangbah jong ki jylla ba synshar da ka seng BJP, ryngkat bad ki nongmihkhmat na ki karkhana bapher bapher, la khmih lynti ba kin ïadonlang ha ka jingïalang kaba heh.
Haba ïasam ïa ki jingtip ba bniah jong ka jingïalang bishar bniah, u Kota u la ong ba ki heh ophisar kynthup ïa u Director General of Police ki la bishar bniah ïa ka jingpynkhreh na ka bynta ka jingwan jngoh jong u Myntri Rangbahduh ka ri ban wan bad ka jingpynsmai ïa ka dorbar thymmai jong ki Myntri.
“La pynïaid ïa ka jingïalang bishar bniah kaba bniah bad u DGP, Assam, mynta ka sngi ban bishar bniah ïa ka jingpynkhreh na ka bynta ka jingleit jngoh kaban sa wan jong u Myntri Rangbahduh ba donburom ban ïashim bynta ha ka jingpynsmai ïa ka Council of Minister bathymmai,” u Kota u la thoh ha ka rynsan X.
Katkum ka jingong ki heh sorkar, ki jingïakren ha kane ka jingïalang ki long halor ka jingpynkhreh ïa ki bor pahara, ka jingpynïaid ïa ka leit ka wan, ka jingpynkhreh ïa ki jaka, ka jingpynbeit ïa ki kyndon bad ka jingïatreilang hapdeng ki tnad sorkar bapher bapher ban pynthikna ba kan ïaid beit ïaid ryntih ka jinglehniam.
U Kota u la ban jur ïa ka jingdonkam ban pyntreikam khlem jingeh ïa ki jingpynbeit, ka jingbud ryntih ïa ki kyndon ba la buh bad ka jingïatreilang kaba jan hapdeng baroh ki nongshim bynta.
“La bthah ïa baroh ki tnad ba dei peit ba kin pynneh ïa ka jingpynkhreh kaba ha khlieh duh ban pynthikna ba ka jinglehniam kan long kaba ïaid beit ïaid ryntih, kaba shngaiñ, bad ha ka rukom kaba ïahap bad ka jingdonkam jong ka jingïalang,” u la ong.
Ha kajuh ka por, u Myntri Rangbah ka jylla u Himanta Biswa Sarma u la dep ban aiti ïa ka jingiehnoh kam sha u Lat ka jylla u Lakshman Prasad Acharya, uba la kyrpad ïa u ban bteng kum u khlieh jong kane ka sorkar ba dang bat kam haduh ban da thaw ïa kane ka kynhun kaba thymmai.
Ka kynhun NDA ba la ïalam da ka seng BJP ka la wanphai biang ha ka bor synshar ha Assam ha ka sien kaba lai lynter hadien ba ka la ïoh ïa ka bor synshar kaba heh bha ha ka elekshon sha ka Ïingdorbar Thawaiñ kaba dang shu kut shen.
Katei ka kynhun synrop, ka la jop 102 ngut ha ka ïing dorbar kaba don 126 ngut ki dkhot, ha kaba ka BJP, ka ïoh 82 tylli ki dkhot, katba ki seng ba la ïatreilang jong ka, ka Bodoland People’s Front bad ka Asom Gana Parishad, ki ïoh 10 tylli ki seat.
Ka seng BJP ka la thung ïa u Myntri ka sorkar pdeng u J P Nadda bad u heh nongïalam u Nalin Kumar Kateel kum ki nongsakhi jong ka sorkar pdeng na ka bynta ka jingjied ïa u nongïalam ka BJP Legislature Party, kaba lah ban long ha ka 10 tarik Jymmang.
