Shillong, Jymmang 08
Ka Mishon SSCC ka la buh jaka khatduh ha ka Pre-Quarter Final jong ka 5th Meghalaya State League da ka jingjop kaba itynnad da 5-2 kol pyrshah ïa ka Lawbah SC ha ka Group F ha Mairang mynta ka sngi.
Ha kawei pat ka jingïalehkai ka Shillong Lajong FC ka la pynliem noh ïa ka Lumphyrnai Sohphoh FC da 5-0 kol ha Wahiajer jong ka Group E.
Ka Mishon ka la pynliem noh ïa ka Lawbah da 5-2 kol. U Rekybart Ryntathiang ha ka minit ba (18′), u Lawanphrang Kurbah (26′) bad u Banshimborlang Ryntathiang (29′) kiba la lah lehkai bha ki la thep 3 tylli ki kol tang ha ka por 10 minit tam na bynta ka Mishon. Ka Lawbah ha ka kylla miet ka la kham ïaryngkat da kaba thep ar ki kol lyngba u Mebadonbor Shangpliang (62′) bad u Adonydevy Riwan (80′) hynrei ka Mishon ka la ïoh biang sa 2 tylli ki kol lyngba u Lawanphrang L Mawnai (66′) bad u Stevenmark L Kynshi (82′) ban khur syndon ïa ka jingjop ha ka jingïalehkai.
Katba ha Wahiajer, ka Lajong kaba dei ka lahduh jong u snem 2019 ka la ïoh ban thep ïa baroh 5 tylli ki kol pyrshah ïa ka Lumphyrnai ha ka kyllamiet lyngba u Colinsalmon Lyngdoh (59′, 82′, 87′), u Badondor Marbaniang (51′) bad u Donboklang Kharjana (80′).
Ka Lajong kan ïakhun pyrshah ïa ka Mishon ha ka Pre-Quarter Final, ha kaba ka Lumphyrnai kan ïakhun pyrshah ïa ka Langsning ha ka Group F.
Lashai ka sngi yn sakhi ïa ka jingïalehkai kaba khatduh na ki 104 tylli ki kynhun bad kan long ha ka Group G hapdeng ka Balmanduri FC pyrshah ïa ka kynhun ïalehkai ba ha khliehduh ka Janepih YSCA ha ka por 3 baje janmiet ha Williamnagar.
