Shillong, Jymmang 10
Ka jingïalehkai kaba 104 ha ka group jong ka lympung ïalehkai 5th Meghalaya State League, la pynlong ha ka sngi Saitjaiñ, ha kaba ka Balmanduri FC ka la lah ban khur ïa ka jingjop da 1-0 kol ïa ka Janepih YSCA, ha ka Group-G ba la long ha Williamnagar.
Ïa kane ka shi kol ka Balmanduri FC la thep da u Jurisbirth Marak ha ka minit kaba 24, hynrei kane kam don jingktah eiei ïa ka Janepih, kaba la dep ban pyntikna lypa ïalade ban bat ïa ka kyrdan ba nyngkong na kane ka group, katba na ka liang ka Balmanduri kan ïai neh ha ka kyrdan kaba saw.
Hynrei ki khmat pat baroh mynta kin phai sha ka kyrdan ïakhun jong ka pre-quarter final, ban ïakhun da ki 16 tylli ki kynhun, ha kaba ki nongjop na kane kawei pat ka kyrdan ïakhun kin bteng ban ïoh jaka ïalade sha ka quarter final, ba don artylli ki group ba don mar saw tylli ki kynhun.
Kumban shu pynpaw biang hangne ba ka MSL mynta ka kynti ka kham long kaba heh bad ba jlan bha ka prokram ïalehkai jong ka haba ïa nujor bad ka MSL kiba la long ha ki snem ba la leit noh bad ba la pynïaid ïa ka kat kum ki kyndon ba la pruid dak da ka All India Football Federation (AIFF)
Ïa ki jingïakhun jong ka pre-quarter final yn sdang pynlong naduh ka lah sngi U Blei, ha ki 6 tylli ki jaka bad baroh ki jingïakhun kin sdang ha ka por 2 baje mynsngi, katba ha nongbah Shillong kan don artylli ki jingïakhun kawei ka ban long ha ka por 1 baje mynsngi bad kawei pat kan long ha ka por 5:30 janmiet ha SSA Stadium, Polo.
