Shillong, Jymmang 12
Ka Meghalaya State Olympic Association (MSOA) kan rakhe ïa ka Olympic Day da kaba kan pynlong ïa ka jingïakop mareh ba la tip kum ka 10k Olympic Day Run na ka bynta ki kynthei bad shynrang kiba 17 snem shaneng, ha ka 27 tarik u Jylliew.
Katkum ka kyrwoh ba la pyllait da u General Secretary kane ka synjuk u Bah Finely Lad Pariat, la ong ba ki lynti mareh kin long kumjuh kumba long ha u snem ba la lah. Katba ki khusnam kin long T. 5,000, T. 3000, T. 2000 ïa kiba wan ba nyngkong, ba-ar bad balai nalor la pynkhreh ruh mar T. 500 na ka bynta ki ‘consolation prize’.
La ong ruh ba yn pynkhreh ïa ki jingai sngewbha ïa ki nongïashim bynta kiba la 55 snem shaneng kiba lah ban pyndep pura ïa ka jingïakop mareh. Yn pynbiang ruh ïa ki jingbam hadien ba la kut katei ka jingïakop mareh bad ha kajuh hi ka sngi yn sam ruh ïa ki sopti (t-shirt). La ong ruh ba ym donkam ban siew eiei ha kaba ïadei bad ka jingpynrung kyrteng ka ban long ha ka shlem treikam jong ka MSOA kaba don ha JN stadium naduh ka por 2 haduh 5 baje janmiet bad ka tarik kaba khatduh kan long ha ka 19 tarik u Jylliew.
