Shillong, Jymmang 12
Ka Langsning FC ka la lah ban pynthikna ban jam sha ka quarter final ne ka Super 8 ha ka lympung ïalehkai Meghalaya State League, hadien ba ka la lah ban pynliem noh ïa ka Lumphyrnai Sohphoh FC da 5-0 kol ha ka sngi Ba-ar ha SSA Stadium.
U Samuel Phawa (25′, 45′, 45+1) u la khur ïa ka hat-trick hadien ba u rangthep kol ba kynsai u Nelson Rymbai (4′) u la pynkhih jar nyngkong eh na ka bynta ka Langsning tang mar ïasdang ka jingïalehkai. Mynta u Nelson u la kynjoh sha ki 15 kol. Ïa ka kol kaba ar la thep da u Denelson Pyngrope ha ka minit kaba 10.
Wat hapdeng ka jinglah ban thep kol da ka Langsning, pynban ki rangïalehkai ka Lumphyrnai Soh-phoh ki la lah ban pyni ïa ka mynsiem ïakhun ban tynjuh bor ïa u rang -apkol ka Langsning u Rajat Paul Lyngdoh.
Ha ka jingshisha ïa kane ka jingïalehkai pre-quarter final la dei ban pynlong ha ka lah sngi U Blei ha Mairang, hynrei na ka daw ka jingjur palat u slap bad ka jingktieh palat ka madan la hap ban pynsangeh noh bad ban pynkynriah noh sha Shillong. Ka Langsning ka dei ka kynhun kaba la bat ïa ka kyrdan ba hakhlieh ha ka Group-F, katba ka Lumphyrnai Sohphoh ka la wan ba-ar ha ka Group-E.
Te kumta ka Langsning ka la long kaba khatduh ban ïoh jaka ha ka quarter final (round robin quarterfinal stage) kaba don phra tylli ki kynhun.
Kumba ka long mynta ka Nongkseh SSCC, Mawlai, SC, Shillong Lajong FC bad ka Rangdajied United FC ki la don ha ka ‘group of death’ ha ka Group-A, katba ka Nangkiew Irat SC, Rymbai Shkenshynriah SC, Langsning FC bad ka Maram FC ki la don ha ka Group-B.
Kine ki kynhun kin ïakhun pyrshah mar ar sien bad ki ar tylli ki kynhun ki ban wan ha ki kyrdan ba hakhlieh na kine ki group kin rung sha ka semi final. Ïa baroh kine ki jingïalehkai yn pynlong ha ka nongbah Shillong.
Na ka liang ka MFA ka la pynbna ban pynlong ar tylli ki jingïalehkai mynta ka sngi Balang kiba dei na ka Group-A ha SSA Stadium. Ha ka por 2 baje nohphai sngi ka Nongkseh kan ïakhun pyrshah ïa ka Mawlai, katba ha ka por 6 baje janmiet ka Lajong ïa ka Rangdajied.
