Shillong, Jymmang 12
U coach ka Barcelona u Hansi Flick u la mynjur ban pynjlan ïa ka kontrak haduh u 2028.
Ka jingjop ha ka sngi U Blei pyrshah ïa ka Real Madrid ka la pynlong ïa ka Barca ban khur ïa ka nam lahduh kaba 29 ha ka lympung La Liga bad kan dei ar snem ba u Flick u la shimti ïa ka kane ka klob.
Une u maneger na Germany uba la 61 snem ka rta u la don lypa hapoh ka jingïateh kular na ka bynta ka samoi ka ban wan bad u la mynjur ban pynjlan sa shisnem, ryngkat bad ka jingjied ban nangpynjlan shuh shuh sa shisnem.
“Nga sngewkmen shisha halor kane ka bynta”, la ong u Flick. “Ki la ai ka jingshaniah ïa nga bad ïa ka kynhun jong nga ban shimti sa shi snem ne ar snem.”
Ka Barca ka la rah ïa ka nam lahduh hadien ba dangsah sa lai tylli ki jingïalehkai bad ka la ïoh ïa ka lad ban pynkut ïa ka samoi ïalehkai da kaba kamai 100 poiñ.
“Bun na ki coach kin sngewkmen lada ki ïoh ïa ka jingïateh kaba lai, saw ne san snem, hynrei ha ka jinglong jong ka Barca ka long kaba biang ban khanglad ïa ka. Nga sngewnguh shibun eh ïa ka,” la ong u Flick.
“Ngin jam sha u snem 2028 bad nangta ngin sa peit lada baroh ki long kiba biang, bad, lada ka long kumta, ngi lah ban rai sa shisnem. Ka klob ka don ka hok, bad nga don ka hok – nga tharai ba ka dei ka jingïateh kaba bha.”
Watla tang hapoh shi taïew ka jingkhlad noh u kpa jong u Flick bad ka la long ka jingsngewsih, hynrei ha ka sngi U Blei ka la long pat ka jingkmen ïa u lyngba ka jingjop ka kynhun jong u ïa ka Real Madrid.
U Flick uba la shimti ha ka jaka u Xavi kum u coach ka Barca ha u snem 2024 bad u la ïalam ïa ka kynhun ban jop ïa ka Copa del Rey ha ka aïom kaba nyngkong jong ka jingshimti jong u.
Kham hashwa u la pynlut ïa ka por ar snem kum u coach ka Germany hadien ba u la bat ar snem ba u la shimti ïa ka Bayern Munich naduh u 2019 haduh u 2021.
