Shillong, Jymmang 12
U Lionel Messi u la long uwei napdeng ki 55 ngut ki rangïalehkai kiba ka Argentina ka la pynbna ïa ka kynhun naka bynta ka jingpynkhreh ïa ka FIFA World Cup ka ban long ha America, Mexico bad Canada.
Une u khlur ïalehkai ba la 38 snem rta un ïalam ha ka bynta kaba shakhmat ryngkat u rangïalehkai shakhmat ka Inter Milan u Lautaro Martinez, Julian Alvarez jong ka Atletico Madrid bad u Santiago Castro jong ka Bologna.
Ha kane ka thup la kynthup lang ïa ki katto katne ngut ki rangïalehkai ki bym pat ju ïoh mih madan ïa kane ka ri, kynthup ïa u rangïalehkai ‘dien ka Boca Juniors u Lautaro Di Lollo, u Castro, u Zaid Romero u rangïalehkai shapdeng jong ka Getafe bad u Santiago Beltran u nongapkol jong ka River Plate.
Na ka liang ka FIFA ka la buh ïa ka por kaba khatduh ha ka 2 tarik u Jylliew na ka bynta ka jingpynbiang ïa ki kynhun ïalehkai ha ka World Cup.
Te kumta ka Argentina kan sdang ïa ka jingïalehkai kaba nyngkong ha ka World Cup pyrshah ïa ka Algeria ha ka 16 tarik u Jylliew hashwa ba kan ïakynduh ïa ka Austria bad ka Jordan ha ka Group-J.
